Երևանի դպրոցականների կյանքում մեծ փոփոխություն չի լինի դասերի մեկնարկի ժամի փոփոխությամբ, բայց որոշումը հիմնազուրկ է․ Ատոմ Մխիթարյան

Նոր ուսումնական տարվանից Երևանի հանրակրթական դպրոցներում դասերը մեկնարկելու են առավոտյան 08:15-ին։ Կրթության, գիտության, մշակույթի և սպորտի նախարար Ժաննա Անդրեասյանը պարզաբանել է, որ փոփոխությունը վերաբերում է բացառապես Երևանի դպրոցներին, մարզերում դասերը կմեկնարկեն առավոտյան 09:00-ից։

Երևանի քաղաքապետարանը հայտարարել է, որ որոշման նպատակն է թեթևացնել մայրաքաղաքի ավտոմոբիլային խցանումները, սակայն այս հիմնավորումը միանշանակ չի ընկալվում մասնագետների շրջանում։ Կրթության փորձագետ Ատոմ Մխիթարյանի խոսքով՝ կրթության որակին չի ազդելու 08:15-ին դասերի մեկնարկը։

«Անկեղծ ասած, ես այս փոփոխության հիմնավորումը չեմ տեսնում։ Եթե սա քաղաքապետարանի առաջարկն է, և նախարարությունը պարզապես ընդառաջել է, ապա կարելի է ասել՝ որոշումը բավականին հիմնազուրկ է։ Նախկին փորձը ցույց է տվել, որ նման քայլերը, օրինակ՝ կարմիր գծերի թանկացումն ու տրանսպորտի սակագնի բարձրացումը, էական ազդեցություն չեն ունեցել քաղաքի խցանումների վրա»,- նշել է Մխիթարյանը։

Նրա խոսքով՝ 15 րոպե ավելի շուտ դասերի մեկնարկը խոշոր ազդեցություն չի ունենա ոչ ուսումնական գործընթացի, ոչ էլ ծնողների առօրյայի վրա։

«Ես էական խնդիր այդտեղ չեմ տեսնում։ Խոսքը ընդամենը 15 րոպեի մասին է։ Այո, կան մասնագետներ, որ պնդում են՝ դա կարող է որոշակի հոգեբանական անհարմարություններ առաջացնել երեխաների մոտ, բայց իմ կարծիքով՝ լուրջ հետևանքներ չի լինելու։ Եթե ծնողները ստիպված կլինեն երեխաներին դպրոց հասցնել ավելի շուտ, ապա այդ ժամանակահատվածը մինչև իրենց աշխատանքի մեկնարկը պարզապես այլ կերպ կկազմակերպեն»,- ասել է նա։

Ատոմ Մխիթարյանը նաև նշել է, որ որոշումը խցանումների խնդիրը լուծելու առումով նույնպես արդյունավետ չի լինելու:

«Եթե սա արվել է խցանումները թեթևացնելու նպատակով, ապա փորձը ցույց է տվել, որ նման քայլերը մեծ արդյունք չեն տալիս։ Այդ 15 րոպեն ակնհայտորեն չի փոխելու մայրաքաղաքի երթևեկության պատկերը»,- եզրափակել է Մխիթարյանը։