Կուբանում կալանավորվել է ադրբեջանցի գործարար ու համայնքի ներկայացուցիչ
Կուբանում կալանավորվել է ադրբեջանական համայնքի ներկայացուցիչ Շահլար Նովրուզովը. հայտնում է РБК-ն՝ հղում անելով Կրասնոդարի դատարանների մամուլի ծառայությանը: Նովրուզովին մեղադրում են մոտ 919 միլիոն ռուբլի արժողությամբ անշարժ գույքի բաժնետոմսերի յուրացման փորձի համար:
Ինչպես հայտնում է «Կոմերսանտ»-ը, 60-ամյա Նովրուզովը Կուբանում ղեկավարում է «Հին Բաքու» և «Դար Ֆրուտ» սրճարանների ընկերությունները, նաև Տուապսե քաղաքի բեռնափոխադրման տերմինալի սեփականատերն է:
Քննչական տվյալների համաձայն՝ Նովրուզովը փորձել է յուրացնել ընկերության 100% բաժնետոմսերը, որոնք տիրապետում են անշարժ գույքի՝ մոտ 919,4 միլիոն ռուբլի արժեքով, ու դատարան է ներկայացրել կեղծ ամուսնության վկայական:
Չնայած փաստաբանը խնդրել է մեղմացնել պատիժը, դատարանը որոշել է Նովրուզովին թողնել կալանքի տակ մինչև սեպտեմբերի 26-ը: Քննիչների պնդմամբ՝ նա կապեր ունի իրավապահ և դատական մարմինների հետ և կարող է թաքնվել քննչական մարմիններից:
