Հայաստան է ժամանել Շվեդիայի Թագավորության Ռիկսդագի աշխատանքային խումբը

Հայաստանի Հանրապետության Ազգային ժողովի և Շվեդիայի Թագավորության Ռիկսդագի միջև ժողովրդավարական համագործակցության զարգացման ծրագրի շրջանակում Հայաստանի Հանրապետություն է ժամանել Շվեդիայի Թագավորության Ռիկսդագի աշխատանքային խումբը, որի ղեկավարը ՇԹ Ռիկսդագի երրորդ փոխխոսնակ Կերստին Լունդգրենն է: Պատվիրակության կազմում է նաև ՇԹ Ռիկսդագի նախագահի առաջին տեղակալ Քենեդ Ֆորսլունդը:

Հայկական կողմից աշխատանքային խմբի ղեկավարը ՀՀ Ազգային ժողովի նախագահի տեղակալ Ռուբեն Ռուբինյանն է:

Ինչպես տեղեկանում ենք ՀՀ ԱԺ-ի տարածած հաղորդագրությունից, ծրագրի նպատակն է ամրապնդել ժողովրդավարական ինստիտուտները և տարածել ժողովրդավարական արժեքները: Համագործակցության առանցքը խորհրդարանականների միջև փորձի փոխանակումն է, շփումների ակտիվացումը, միջխորհրդարանական կապերի զարգացումը:

Այցի ընթացքում կողմերը քննարկումներ են ունեցել «Էթիկայի կանոնագիրք» (Code of Conduct), «Բացություն և թափանցիկություն» (Openness and Transparency), «Մեծամասնության և ընդդիմության միջև հարաբերությունները» (Relations between Majority and Opposition) թեմաներով:

«Էթիկայի կանոնագիրք» թեմայով որպես բանախոսներ հանդես են եկել ՀՀ ԱԺ պետական-իրավական հարցերի մշտական հանձնաժողովի նախագահի տեղակալ Արուսյակ Ջուլհակյանը և ՀՀ կոռուպցիայի կանխարգելման հանձնաժողովի նախագահի պարտականությունները կատարող Մարիամ Գալստյանը:

Խորհրդարանականները հանդիպում են ունեցել ՀՀ ԿԸՀ նախագահ Վահագն Հովակիմյանի հետ:

Հյուրերը եղել են Ծիծեռնակաբերդի հուշահամալիրում, ծաղիկներ դրել Հայոց ցեղասպանության զոհերի հիշատակը հավերժացնող անմար կրակի մոտ: