Վենեսուելայի նախագահը քննադատում է ԱՄՆ-ին և նախազգուշացնում հարձակման հետևանքների մասին
Վենեսուելայի նախագահ Նիկոլաս Մադուրոն մեկնաբանել է երկրում ԱՄՆ-ի հնարավոր ռազմական միջամտությունը։ Զինվորականների հետ հանդիպման ժամանակ Մադուրոն պատասխանել է ԱՄՆ նախագահ Դոնալդ Թրամփի սպառնալիքին՝ խփել իրենց ինքնաթիռները։
«Մենք այժմ գտնվում ենք անզեն պայքարի փուլում։ Սա քաղաքական, հաղորդակցական և կազմակերպչական փուլ է։ Եթե Վենեսուելան հարձակման ենթարկվի, մենք կանցնենք զինված պայքարի փուլ։ Մենք խաղաղ, բայց միևնույն ժամանակ մարտնչող ժողովուրդ ենք։ Ոչ ոք չի կարող մեզ ստրկացնել՝ այսօր կամ ապագայում։ ԱՄՆ-ն պետք է հրաժարվի Վենեսուելայում բռնի ռեժիմի փոփոխության իր ծրագրերից։ Եթե հարձակում տեղի ունենա, մեր ժողովուրդը՝ ազգային, տեղական և տարածաշրջանային մակարդակներում համակարգված և կազմակերպված կերպով, կանցնի զինված պայքարի փուլ», – ասել է նա։
