Ադրբեջանը ՄիԳ-29 կործանիչներ է փոխանցել Ուկրաինայի ռազմաօդային ուժերին․ Zona Militar

F-16-ների և Mirage 2000-5-ների ժամանման հետ, որոնք այժմ ավելի մեծ թվով են կիրառվում Ուկրաինայի ռազմաօդային ուժերում, հեշտ է մոռանալ, որ ավելի վաղ արևմտյան դաշնակիցները, ինչպիսիք են Սլովակիան և Լեհաստանը, իրենց խորհրդային ծագում ունեցող MiG-29 կործանիչների մի մասը մատակարարել էին Կիևին: Այնուամենայնիվ, անցյալ շաբաթվա ընթացքում վիրուսային դարձած պատկերների միջոցով կարելի է ենթադրել, որ մեկ այլ երկիր նույնպես կարող էր Կիևին փոխանցել այս տեսակի ինքնաթիռներ։ Խոսքն Ադրբեջանի մասին է, որը սկսել է իր MiG-29-ները փոխարինել Պակիստանից գնված ավելի ժամանակակից JF-17 Thunder Block III-ով: Այս մասին հայտնել է Zona Militar պարբերականը։

Ինչպես նշվել է, 2022 թվականի փետրվարին Մոսկվայի հետ սկսված պատերազմից ավելի քան երեք տարի անց և չնայած արևմտյան ինքնաթիռների մատակարարումներին, Միկոյանի MiG-29-ը շարունակում է մնալ Ուկրաինայի ռազմաօդային ուժերի հիմնական շարժիչ ուժերից մեկը:

Բազմաթիվ հաղորդագրությունների համաձայն՝ Ուկրաինայի կողմից ժառանգված խորհրդային դարաշրջանի ինքնաթիռները դեռևս ծառայության մեջ են՝ սկսած օդային պաշտպանությունից, խափանումից և ուղեկցումից մինչև ցամաքային թիրախների դեմ ամենավտանգավոր հարվածային գործողություններ և մոտակա օդային աջակցություն: Այս առաքելությունների համար, ինչպես մյուս ինքնաթիռները, ինչպիսիք են Սու-24-ը, Սու-25-ը և Սու-27-ը, ՄիԳ-29-ներն օգտագործվել են Արևմուտքի կողմից մատակարարվող տարբեր զինամթերքի հետ, այդ թվում՝ Ֆրանսիայի կողմից տրամադրված HAMMER հավաքածուով AASM ռումբերով և ԱՄՆ–ում արտադրված փոքր տրամաչափի ռումբերով (SDB):

Գնահատականների համաձայն՝ Լեհաստանն ու Սլովակիան իրենց ռազմաօդային ուժերից Կիև են մատակարարել 28 կործանիչ։ Վերջին օրերին նկատվել է Ուկրաինայի ռազմաօդային ուժերի ծառայության մեջ գտնվող ևս մեկ ՄիԳ-29-ն՝ Ադրբեջանի ռազմաօդային ուժերի կողմից նախկինում օգտագործվող յուրահատուկ գունային սխեմայով։

Չնայած պաշտոնական հայտարարություն չի արվել, Ադրբեջանն ու Ուկրաինան պահպանում են բազմակողմանի համագործակցային կապեր։ Ինչպես նշվել է, աա հանգեցրել է նրան, որ Բաքուն իրականացնի զենքի և սարքավորումների նպատակային փոխանցումներ Ուկրաինայի զինված ուժերին։ Դա ունեցել է ոչ պաշտոնական բնույթ՝ հաշվի առնելով Կովկասում ուժերի նուրբ հավասարակշռությունը, որտեղ Ռուսաստանը և Հայաստանը հիմնական խաղացողներ են։