Նեպալում ցուցարարները հրկիզել են վարչապետի նստավայրն ու խորհրդարանի շենքը․ Reuters

Ցուցարարները հրկիզել են Նեպալի հեռացող վարչապետ Շարմա Օլիի նստավայրը․ գրում է Reuters գործակալությունը՝ հղում անելով Օլիի օգնականին։

Հեռուստատեսային կադրերում երևում է, թե ինչպես են ցուցարարները ներխուժում տարածք և թալանում այն՝ կոտրելով պատուհանները, կահույքը, նախքան նստավայրը հրկիզելը:

Անվտանգության ուժերը, որոնք թվաքանակով զիջում էին ցուցարարներին, հետևում էին մի քանի մետր հեռավորությունից:

Սոցիալական ցանցերում շրջանառվող տեսանյութում երևում է, թե ինչպես են ցուցարարները հարձակվում 2021-2022 թվականներին երկրի վարչապետ Շեր Բահադուր Դեուբայի և նրա կնոջ՝ Օլիի օրոք արտաքին գործերի նախարար Արզու Ռանայի վրա։

Reuters-ը, սակայն, նշում է, որ չի կարողացել ստուգել տեսանյութերի իսկությունը։

Ականատեսները պատմել են, որ Սինգհա Դուրբար շրջանը, որտեղ գտնվում են վարչապետի գրասենյակը և այլ նախարարություններ, ինչպես նաև խորհրդարանի շենքը, հրդեհվել են։