ԱՄՆ դեմոկրատները կոչ են արել Թրամփին Չինաստանի արտադրությունը սահմանափակող առևտրային համաձայնագիր կնքել․ Reuters
ԱՄՆ դեմոկրատները խնդրել են Թրամփի վարչակազմին ճնշում գործադրել Չինաստանի վրա՝ զսպելու «կառուցվածքային գերարտադրությունը», որն, ըստ էության, վերանայում է Պեկինի տնտեսական մոդելը։ Միևնոյն ժամանակ՝ ԱՄՆ ֆինանսների նախարար Սքոթ Բեսենթը բանակցություններ է վարում չինացի պաշտոնյաների հետ Իսպանիայում․ գրել է Reuters-ը։
Ներկայացուցիչների պալատի՝ Չինաստանի հարցերով հանձնաժողովի դեմոկրատ անդամները հայտարարել են, որ ցանկացած երկկողմ առևտրային համաձայնագիր պետք է ներառի Պեկինի նկատմամբ «պարտադիր պահանջներ»՝ արդյունաբերական գերարտադրությունը նվազեցնելու համար։
Չինաստանը արտադրում է շատ ավելի արդյունաբերական ապրանքներ, քան կարող է սպառվել երկրի ներսում, ինչը խթանում է արտահանումը և գնային պատերազմները երկրի ներսում։ Պեկինն այժմ արշավ է սկսել դեֆլյացիայի և գնային պատերազմների դեմ որոշ ոլորտներում։
Բեսենթը, առևտրի ներկայացուցիչ Ջեյմիսոն Գրիրը և Առևտրի նախարար Հովարդ Լուտնիկը Մադրիդում բանակցություններ են սկսել Չինաստանի փոխվարչապետ Հե Լիֆենգի գլխավորած չինական թիմի հետ։
Աշխարհի երկու խոշորագույն տնտեսությունները դժվարանում են եռանիշ սակագների վերաբերյալ զինադադարը վերածել երկարաժամկետ առևտրային գործարքի՝ լուծելու համար ֆենտանիլից և ԱՄՆ առևտրային դեֆիցիտից մինչև TikTok-ի սեփականության հետ կապված բողոքները։
Նամակում նշվում է, որ բանակցություններում պետք է քննարկվի գերարտադրողականությունը՝ որպես օրինակ բերելով Չինաստանի պողպատի և արևային վահանակների արդյունաբերությունը, որտեղ մատակարարման զանգվածային ընդլայնմանը հաջորդել են արտահանման ալիքներ, ինչի հետևանքով էլ՝ կրճատվել են աշխատատեղերը և արդյունաբերությունը ԱՄՆ-ում և այլուր։
