ԵՄ-Հնդկաստան առևտրային համաձայնագիրը կարող է խաթարվել բասմատի բրնձի շուրջ վեճի պատճառով. Financial Times

 Հնդկաստանի և Պակիստանի միջև բասմատի բրնձի անվանման բացառիկ իրավունքի շուրջ վեճը կարող է բարդացնել Նյու Դելիի և Եվրամիության միջև ազատ առևտրի համաձայնագրի կնքումը. գրում է Financial Times-ը։

Հնդկաստանը և Պակիստանը բասմատի բրնձի աշխարհի խոշորագույն արտադրողներն են։ Հնդկաստանը պնդում է, որ իրեն է պատկանում բասմատի անվանման օգտագործման բացառիկ իրավունքը։ Այս բրնձի մեկ տոննան 200-300 դոլարով ավելի թանկ է, քան մյուս տեսակները։ Հնդկաստանը յոթ տարի առաջ դիմել է ԵՄ շուկայում անվանման պաշտպանության համար, բայց դիմումը դեռևս քննարկվում է։ 2023 թվականին Պակիստանը ներկայացրել է մրցակցային դիմում, որում նշվում է, որ բասմատի բրինձը աճեցվում է, այդ թվում՝ Քաշմիրի չորս տարածքներում, որը վիճելի շրջան է, որը վերահսկվում է Պակիստանի կողմից։

Եվրոպացի պաշտոնյաների խոսքով՝ Պակիստանի դիմումի հաստատումը կարող է արդյունավետորեն նշանակել Պակիստանի ինքնիշխանության ճանաչում այդ տարածքների նկատմամբ, ինչը «կզայրացնի Նյու Դելիին»։

«Հնդկաստանի և Պակիստանի դիմումները մշակվում են զուգահեռաբար», – ասված է Պակիստանում ԵՄ պատվիրակության հայտարարության մեջ։ Երկու դիմումներն էլ «ուշադիր քննարկվում են», և Եվրոպական հանձնաժողովը հասկանում է դրանց «զգայուն բնույթը», – ասել են պատվիրակությունում։

FT-ն գրում է, որ Հնդկաստանի և Պակիստանի համար բասմատին ազգային հպարտության խորհրդանիշ է։ Այս բրնձի տեսակը հիմնականում աճեցվում է Փանջաբ շրջանում, որը բաժանված է Հնդկաստանի և Պակիստանի միջև։