Օլեգ Գազմանովն իր բոլոր խնայողությունները փոխանցել է խարդախության համար մեղադրվող Գևորգ Սարգսյանին. փաստաբան

Ռուս երգիչ Օլեգ Գազմանովը խարդախության համար մեղադրվող Գևորգ Սարգսյանին է տվել իր խնայած ամբողջ գումարը․  РИА Новости–ին ասել է Գազմանովների ընտանիքի փաստաբան Ռոման Կուզմինը:

«2019 թվականին Օլեգ Միխայլովիչը վարկ է տրամադրել Սարգսյանին, ինչպես նաև նրա կինը՝ Մարինա Անատոլիևնան։ Հատկանշականն այն է, որ սա այն ամբողջ գումարն էր, որն Օլեգ Միխայլովիչը պահել էր թոշակի համար»,- ասել է Կուզմինը։

Ըստ նրա՝ 2016 թվականին Սարգսյանն սկսել է ինտեգրվել Գազմանովների ընտանիքի շրջանակում՝ փորձելով դրական կերպար ստեղծել։

«Ըստ էության, նա օգտվել է այդ հարաբերություններից և ստացել է գումարը։ Մեկ տարի անց նրանք պահանջել են գումարը վերադարձնել, բայց Սարգսյանն ասել է, որ փող չկա։ Անհասկանալի է, թե որտեղ է նա (Սարգսյանը – խմբ.) ներդրել այն»,- բացատրել է փաստաբանը։

Նշվում է, որ Սարգսյանը Ռուսաստանի քաղաքացի է, բայց վերջին տարիներին ապրում է Միացյալ Նահանգներում։ Նա այնտեղ ունի ընտանիք, տուն, սեփականություն։

Գազմանով ընտանիքն ավելի ուշ գլխի է ընկել, որ իրենց խաբել են, և որոշել է բողոք ներկայացնել Ռուսաստանի քննչական կոմիտե։