Եվրոպացիները չարաշահում են պատժամիջոցների մեխանիզմը՝ իրենց քաղաքական նպատակներն առաջ մղելու համար․ Իրանի ԱԳՆ
Իրանը շարունակում է հավատարիմ մնալ դիվանագիտությանը, սակայն նրա ապագա գործողությունները լիովին կախված կլինեն Թեհրանի դեմ պատժամիջոցները վերականգնելու ԵՄ-ի որոշումից։ Ինչպես գրում է РИА Новости -ն, այդ մասին հայտարարել է Իրանի փոխարտգործնախարար Սաիդ Խաթիբզադեն։
Նա նշել է, որ Իրանը նամակ է ուղարկել ՄԱԿ-ի գլխավոր քարտուղարին, որում նշել է, որ եվրոպացիներն իրավական հիմք չունեն դիմելու «վերականգնման մեխանիզմին»։
«Եվրոպացիները ներկայում չարաշահում են այս մեխանիզմը՝ իրենց քաղաքական նպատակներն առաջ մղելու համար։ Իրանի արձագանքը լիովին կախված կլինի նրանից, թե ինչ կպատահի։ Մենք շարունակում ենք հավատալ, որ դիվանագիտության պատուհանը բաց է մնում։ Մենք հավատարիմ ենք դիվանագիտությանը։ Այս պայքարին ռազմական արձագանք չի կարող լինել, և մենք կարծում ենք, որ ապագայում դիվանագիտության միջոցով կարելի է ավելի մեծ հաջողությունների հասնել», – լրագրողներին հայտնել է նա։
Խաթիբզադեի խոսքով՝ Իրանը չի կարողանա ընդունել նոր միջուկային համաձայնագիր, եթե ԵՄ եռյակը շարունակի անհիմն և անպատասխանատու վարվել։ Նա հավելել է, որ «եռյակը» խոստացել է հարգել ՄԱԳԱՏԷ-ի հետ կնքված համաձայնագիրը, բայց չի գործում համապատասխանաբար։
