ՀՀ-ում դատական իշխանությունը ժողովրդի հետ ոչ մի օրգանական կապ չունի. Փաշինյանի հայտարարությունները` կետերով
Նիկոլ Փաշինյանը Ժողովրդավարության հայկական ֆորումի շրջանակում մասնակցում է պանելային քննարկման, որի առանցքային հայտարարությունները ներկայացնում ենք կետերով.
- Առաջարկում եմ, որ «երազանք», «ապագա», «իդեալ» բառերի հետ մենք մեր հարաբերությունները փոխենք, որովհետև ինչի՞ մենք պետք է երազենք ժողովրդավարության մասին, եթե մենք այսօր կարող ենք այդ ժողովրդավարությունը քննարկել, ստեղծել, կառուցել։
- 2018 թվականից այս կողմ Հայաստանում որևէ ընտրություն չի կեղծվել։
- Կարծում եմ, որ Հայաստանում մամուլը գործում է ազատորեն, և ինտերնետից օգտվելու որևէ սահմանափակում չկա։
- Ո՞վ է Հայաստանում ժողովրդավարության լիդերը, ժողովրդավարության պաշտպանը և ժողովրդավարության արժեքների կրողը։ Այս դեպքում բացառիկ իրավիճակ ունենք, որ այդ արժեքների կրողն իշխանությունն է։
- Ժողովրդավարության ամենակարևոր հատկանիշն ինքնահայեցումն է. այնտեղ, որտեղ չկա ինքնահայեցում, այնտեղ չկա ժողովրդավարություն։
- Հայաստանում ամենակարևոր բարեփոխումներից մեկը պիտի լինի նոր Սահմանադրության ընդունումը: Այդտեղ ամենակարևոր ինստիտուցիոնալ խնդիրը պետք է լուծվի՝ դատական իշխանության օրգանիկ կապի ստեղծումը ժողովրդի հետ։
- Նախ մտածողությունը պետք է փոխվի, հետո՝ Սահմանադրությունը։
- Ես այսօր տեսնում եմ լուրջ համակարգային պրոբլեմ. Հայաստանի Հանրապետությունում դատական իշխանությունը չի բխում ժողովրդից և նրա հետ ոչ մի օրգանական կապ չունի։
- ՀՀ-ում ժողովրդավարության մի հսկայական մաս պարզ հայհոյախոսություն է: Հեր, մեր, էրեխա ենք հայհոյում, սա՞ է այսօր մեր ժողովրդավարությունը, ո՞վ է պայքարում սրա դեմ:
