Մեծ ողբերգություն է ամբողջ հասարակության և նրանց համար, ովքեր այսօր զոհ են դարձել Փաշինյանի քաղաքականությանը․ Արա Աբրահամյանը՝ Վալոդյա Գրիգորյանի սպանության մասին
Իշխող կուսակցության պաշտպանությանն ուղղված ոստիկանական համակարգի ամրապնդման ֆոնին` Հայաստանի քաղաքացիներն ավելի անպաշտպան են դառնում. այս մասին РИА Новости-ին ասել է Ռուսաստանի հայերի միության ղեկավար Արա Աբրահամյանը՝ մեկնաբանելով Փարաքար համայնքի ղեկավար Վալոդյա Գրիգորյանի սպանությունը։
«Փարաքար համայնքի ղեկավար Վալոդյա Գրիգորյանի և Կարեն Աբրահամյանի սպանությունը ցնցեց ողջ հայ համայնքը, բայց, ցավոք, չզարմացրեց նրանց։ Այս հանցագործությունը դարձավ ևս մեկ դրվագ վերջին տարիներին Հայաստանում ձևավորվող արտաքին և ներքին անվտանգության երաշխիքների բացակայության համակարգում։ Պարադոքսն այն է, որ հասարակությունը և Հայաստանի յուրաքանչյուր քաղաքացի օրեցօր ավելի ու ավելի անպաշտպան են դառնում՝ իշխող կուսակցության շահերը պաշտպանելու և սպասարկելուն ուղղված ոստիկանական համակարգի ամրապնդման ֆոնին»,- նշել է Աբրահամյանը:
Նա հավելել է, որ սա ողբերգություն է ոչ միայն զոհերի ընտանիքների և ընկերների, այլև՝ նրանց ընկերների համար, որոնց Արա Աբրահամյանը հայտնել է իր անկեղծ ցավակցությունը։
«Սա մեծ ողբերգություն է ամբողջ հասարակության, նրանց համար, ովքեր այսօր զոհ են դարձել Նիկոլ Փաշինյանի քաղաքականությանը», – նշել է Աբրահամյանը։
Նրա կարծիքով՝ Փաշինյանի ետևում կանգնած են որոշակի ուժեր, որոնք նորմալ են համարում, որ նրանց կողմից պարտադրված բաժանարար գծերը հայերին միմյանց դեմ, եղբորը եղբոր դեմ են հանում, արժեքները քայքայում և մարդկանց կամ խմբերի միջև հարգալից հարաբերությունները դիտավորյալ ոչնչացնում են, ինչը դրսևորվում է զգացմունքների և ավանդույթների արժեզրկմամբ։ «Հուսով եմ, որ իրավապահ մարմինները կդադարեցնեն հոգևորականների և բարերարների հետապնդումը և անհապաղ կբացահայտեն այս աղաղակող հանցագործությունը, իսկ մեղավորները կպատժվեն», – հավելել է նա։
