Թեհրանն ու Մոսկվան 25 մլրդ դոլարի համաձայնագիր են կնքել ատոմակայան կառուցելու վերաբերյալ
Իրանն ու Ռուսաստանը 25 միլիարդ դոլարի համաձայնագիր են կնքել Հորմոզգան նահանգում «Հորմոզ» ատոմակայանի (ԱԷԿ) կառուցման վերաբերյալ. հայտնում է IRNA լրատվական գործակալությունը։
Համաձայնագիրը ստորագրել են Իրանի ատոմային Էներգիայի կազմակերպության կողմից «Իրան Հորմոզ»-ի ներկայացուցիչ Նասեր Մանսուր Շարիֆլուն և Ռուսաստանի կողմից «Ռոսատոմ Էներգետիկ նախագծեր»-ի ներկայացուցիչ Դմիտրի Շիգանովը։
ԱԷԿ-ը բաղկացած կլինի չորս էներգաբլոկից: Նախագծի համար հատկացվել է 500 հեկտար տարածք:
Ստորագրման արարողության ժամանակ հայտարարվել է, որ այս համաձայնագիրը ստորագրվել է երկու բարեկամ երկրների՝ Իրանի Իսլամական Հանրապետության և Ռուսաստանի Դաշնության միջև՝ միջուկային էներգիայի խաղաղ օգտագործման ոլորտում համատեղ համագործակցության զարգացմանը համապատասխան։
Գործակալության տվյալներով՝ ներկայում ավարտվել են տեղանքի ընտրության ուսումնասիրությունները, իրականացվում և ավարտվում են ինժեներական և բնապահպանական ուսումնասիրությունները, ինչպես նաև՝ տեղանքի նախապատրաստման որոշ աշխատանքներ։
