ԵՄ առաջնորդները Կոպենհագենի գագաթնաժողովում չեն կարողացել համաձայնության գալ շատ հարցերի շուրջ. Politico

Կոպենհագենի գագաթնաժողովին հավաքված ԵՄ առաջնորդները քիչ հարցերի շուրջ են կարողացել  հասնել համաձայնության: Շատ փաստաթղթեր, հավանաբար, պատրաստ չեն լինի հոկտեմբերի վերջին կայանալիք առաջնորդների հաջորդ հանդիպմանը, որը Եվրոպական խորհրդի նախագահ Անտոնիու Կոշտան նախկինում անվանել էր «որոշման օր». գրում է Politico–ն՝ հղում անելով դռնփակ բանակցություններին ծանոթ մի քանի դիվանագետների։

Ինչպես նշում է թերթը, շատ փաստաթղթեր դեռևս պատրաստ չեն լինի առաջնորդների հաջորդ հանդիպմանը, ինչը նշանակում է, որ «ինչպես շատ այլ գագաթնաժողովներում, հաջորդը միշտ դառնում է իսկապես վճռորոշը»։

ԵՄ երկրները պատրաստ չէին հավանություն տալ Եվրոպական հանձնաժողովի՝ Ուկրաինային վարկ տրամադրելու համար ռուսական սառեցված ակտիվներն օգտագործելու ծրագրին։

Հանձնաժողովը ցանկանում է Ուկրաինային առաջարկել 140 միլիարդ եվրո վարկ: ԵՄ պաշտոնյաները սա համարում են խելացի շրջանցիկ միջոց՝ դրանց բռնագրավումից խուսափելու համար, որը կարող է խախտել միջազգային իրավունքը։

Կոպենհագենում գործարքի չհամաձայնեցման պատճառներից մեկն այն է, որ որոշ երկրներ, մասնավորապես Բելգիան, պետք է վստահ լինեն, որ ծրագիրն իրավաբանորեն հիմնավորված է։

Բելգիայի վարչապետ Բարտ դե Վևերն ամենազգույշն էր, քանի որ իր երկիրը կկրի Ռուսաստանի կողմից ցանկացած իրավական գործողության ծանրությունը։

Գագաթնաժողովից հետո հանձնաժողովի նախագահ Ուրսուլա ֆոն դեր Լյայենը փորձել է վստահեցնել Բելգիային և այլ դժկամ երկրներին, որ իր ծրագրի համաձայն՝ ակտիվները չեն բռնագրավվի, և որ «ռիսկերի պատասխանատվությունն ավելի լայն շրջանակի վրա է»։

Հաշվի առնելով հետագա քննարկումների անհրաժեշտությունը՝ գագաթնաժողովի գործընթացին ծանոթ ԵՄ պաշտոնյան նշել է, որ գագաթնաժողովի 27 պաշտպանության նախարարների և ԵՄ գլխավոր դիվանագետ Կայա Կալլասի հանդիպումներն ավելի հաճախակի կլինեն։

Գերմանիայի կանցլեր Ֆրիդրիխ Մերցը գագաթնաժողովին եկել էր մրցունակության մասին խոսելու ցանկությամբ, սակայն ձախողեց։ Թվում էր՝ Մերցը չէր նախատեսել կարդալ պաշտոնական ժամանակացույցը, որը ներառում էր մեկ նիստ պաշտպանության և մեկ այլ նիստ՝ Ուկրաինայի վերաբերյալ։ Սակայն գագաթնաժողովի պաշտոնյաները պատրանքներ չունեին, իսկ նրա ուղերձը նախատեսված էր ներքին լսարանի համար։ Գերմանիայի առաջնորդը գտնվում է աճող ճնշման տակ՝ վերափոխելու ԵՄ ամենամեծ տնտեսությունը և իրականացնելու այն լայնածավալ բարեփոխումներն ու արագ շրջադարձը, որոնց վրա նա հույսը դրել էր իր ընտրարշավի ժամանակ։

Կոշտայի՝ ԵՄ-ին Ուկրաինայի անդամակցության գործընթացն արագացնելու գաղափարը ևս չաշխատեց, ինչը նույնպես զարմանալի չէր։

Դանիայում կայացած ԵՄ ոչ պաշտոնական գագաթնաժողովից հետո, Կոշտան հայտարարել է, որ Եվրահանձնաժողովը երկու շաբաթից կներկայացնի մինչև 2030 թվականը ԵՄ պաշտպանական պատրաստվածության իր «ճանապարհային քարտեզը», որը կքննարկվի հոկտեմբերի 23-24-ին կայանալիք ԵՄ գագաթնաժողովում։