Ինչպե՞ս է ալկոհոլը նպաստում քաղցկեղի առաջացմանը․ ԱՀԿ-ի անդրադարձը

Ալկոհոլը քաղցկեղի առաջացման առաջատար պատճառներից է ամբողջ Եվրոպայում․ գրում է Euronews-ը։

Փորձագետները նշում են, որ ալկոհոլի օգտագործումը նվազեցնելուն ուղղված կառավարությունների ավելի խիստ քաղաքականությունը կարող է կանխել քաղցկեղի առաջացման հազարավոր դեպքեր և մահվան ելքեր ամեն տարի։ 

Ըստ Առողջապահության համաշխարհային կազմակերպության քաղցկեղի հետազոտությունների գործակալության (IARC) նոր գիտական ​​​​վերլուծության՝ աշխարհում ալկոհոլի ամենամեծ սպառող հանդիսացող Եվրամիության տարածքում 2020 թվականին ալկոհոլը քաղցկեղի ավելի քան 111,000 նոր դեպքի պատճառ է դարձել։ 

Ամբողջ աշխարհում այդ թիվը հասել է մոտավորապես 741,000-ի․ դեպքերի գրեթե 70 տոկոսը գրանցվել է տղամարդկանց մոտ։ 

IARC-ն ալկոհոլը որպես քաղցկեղածին առաջին անգամ դասակարգել է 1988 թվականին։ Գործակալությունը նշում է, որ ալկոհոլը մեծացնում է քաղցկեղի առնվազն յոթ տեսակի առաջացման ռիսկը, այդ թվում՝ բերանի խոռոչի, ըմպանի, կոկորդի, կերակրափողի, լյարդի, հաստ աղիքի և կանանց շրջանում կրծքագեղձի։ 

Հետազոտողները նշում են, որ ալկոհոլը քաղցկեղ է առաջացնում տարբեր մեխանիզմներով, այդ թվում՝ հորմոնալ մակարդակի փոփոխության, աղիքային միկրոբիոմի փոփոխությունների և օքսիդատիվ սթրեսի պատճառով ԴՆԹ-ի վնասման ճանապարհներով։ 

Նշվում է, որ ալկոհոլի քիչ օգտագործումը նվազեցնում է նմանատիպ քաղցկեղների զարգացման ռիսկը։