Mango ընկերության հիմնադրի մահվան համար կասկածվում է որդին

Իսպանական ոստիկանությունը հետաքննում է Mango ընկերության հիմնադիր Իսակ Էնդիքի հանկարծակի մահը որպես հնարավոր սպանություն․ գլխավոր կասկածյալն Էնդիքի որդին է․ գրում է France-Presse գործակալությունը։

71-ամյա Էնդիքը, որի հիմնադրած ընկերությունն ամբողջ աշխարհում ունի մոտ 2800 մասնաճյուղ, մահացել է անցյալ տարվա դեկտեմբերին Բարսելոնայի մերձակայքում լեռնագնացության ժամանակ տեղի ունեցած միջադեպի ժամանակ։

Կատալոնիայի ոստիկանությունն այժմ Էնդիքի մահվան դեպքը հետաքննում է ոչ թե որպես դժբախտ պատահար, այլ սպանություն․ հիմնական կասկածյալն Էնդիքի որդին՝  Ջոնաթանն է․ գրում է El Pais թերթը՝ հղում անելով «հետաքննությանը տեղյակ տարբեր աղբյուրների»։

Ջոնաթանը, որը միջադեպի ժամանակ հոր հետ եղած միակ մարդն էր, երկու իրար հակասող ցուցմունք է տվել, ինչը քննիչների մոտ կասկածներ է հարուցել։

«Վկան հակասել է ինքն իրեն, անորոշ հայտարարություններ է արել և նկարագրել իրադարձություններ, որոնք չեն համընկնում կատալոնական ոստիկանության կողմից Մոնսերատ լեռներում տեղի ունեցած դեպքի վայրի զննման արդյունքների հետ», –  հավելել է թերթը։

Կատալոնիայի ոստիկանությունը հետաքննության առնչությամբ մեկնաբանություններ չի տվել։

Ստամբուլում ծնված Իսակ Էնդիքն Իսպանիայի ամենահարուստ մարդկանցից էր։ Ըստ Forbes-ի՝ նրա և նրա ընտանիքի կարողությունը գնահատվել է 4,5 միլիարդ դոլար։

Էնդիքն իր առաջին խանութը բացել էր Բարսելոնայում 1984 թվականին։ Նրա Mango ապրանքանիշն արագ տարածվել է ամբողջ Իսպանիայում և դարձել աշխարհի առաջատար նորաձևության ընկերություններից մեկը։