Հայտնաբերվել է որպես անհետ կորած որոնվող 23-ամյա Այշատ Բայմուրադովայի դին

Հայտնաբերվել է որպես անհետ կորած որոնվող կնոջ դիակը, նշանակվել են փորձաքննություններ․ հայտնում են ՆԳ նախարարությունից։

Հոկտեմբերի 19-ին ՆԳՆ ոստիկանության օպերատիվ կառավարման կենտրոն է զանգահարել մի քաղաքացի և հայտնել, որ Երևանի Դեմիրճյան փողոցի վարձակալության տրված բնակարաններից մեկում կնոջ դի կա։

Նշված վայր են մեկնել ՆԳՆ ոստիկանության օպերատիվ խմբեր։ Պարզվել է, որ հայտնաբերվածը հոկտեմբերի 17-ից որպես անհետ կորած որոնվող 23-ամյա Այշատ Բայմուրադովայի դիակն է։

Նշանակվել են փորձաքննություններ։ Հանգամանքները պարզվում են։ Կատարվում է նախաքննություն։

Ինչպես հաղորդել էինք ավելի վաղ, Այշատ Բայմուրադովան հոկտեմբերի 15-ին դուրս էր եկել Ազատության պողոտայի հասցեներից մեկից և այլևս չէր վերադարձել։

Ռուսական Дождь-ի փոխանցմամբ՝ չեչենուհին Ռուսաստանից փախել է Հայաստան՝ ընտանեկան բռնության պատճառով։

Բայմուրադովան իր սենյակակիցներին ասել էր, որ զբոսանքի է դուրս եկել Instagram-ում ծանոթացած ընկերուհու հետ, որից հետո նրա հետ կապը կորել էր։

Дождь-ի պնդմամբ՝ իրավապաշտպանները ենթադրում էին, որ աղջկան առևանգել են։