«Արտահայտել է իր կարծիքը». Լատվիայի ԱԳՆ-ն մեկնաբանել է «Զանգեզուրի միջանցքի» վերաբերյալ Ադրբեջանում իր դեսպանի վիճահարույց հարցազրույցը
Ադրբեջանական լրատվական գործակալություններից մեկը հոկտեմբերի 21-ին հրապարակել է Ադրբեջանում Լատվիայի դեսպան Էդգարս Սկույայի հետ հարցազրույցը, որում նա հիշատակել է «Զանգեզուրի միջանցքը»։
«Այս միջանցքը հսկայական դեր է խաղում Արևելքից Եվրոպա և հակառակը տարանցիկ և լոգիստիկ տրանսպորտի զարգացման գործում։ Սա մեծ նվաճում կլինի։ Մեր ընկերությունները նաև քննարկում են դեպի Բալթիկ ծովի նավահանգիստներ երթուղու ընդլայնումը։ Չնայած դեռևս կոնկրետ նախագծեր չկան, այս նախաձեռնության մասշտաբները տպավորիչ են»,- ասել էր նա։
«Хроники Кавказа» հրատարակության խմբագրակազմը հարցում է ուղարկել Լատվիայի ԱԳ նախարարություն՝ խնդրելով պարզաբանել երկրի դիրքորոշումը «Զանգեզուրի միջանցք» տերմինի օգտագործման վերաբերյալ, քանի որ Հայաստանի իշխանությունները չեն ճանաչում այն, և որ տերմինը պաշտոնապես չի օգտագործվում վաշինգտոնյան համաձայնագրերում։ Հարց է ուղղվել նաև, թե արդյո՞ք Լատվիան պլանավորում է տարածաշրջանային տրանսպորտային նախաձեռնությունները խթանելիս հիմնվել միջազգային նախագծերի վրա, ինչպիսին TRIPP-ն է, և համակարգել իր դիրքորոշումը գործընկերների հետ՝ երկիմաստությունից խուսափելու համար։
Լատվիայի ԱԳՆ-ն պաշտոնական մեկնաբանություն է տվել.
«Լատվիան հարգում է միջազգային համաձայնագրերը և գործընկեր երկրների դիրքորոշումները, և ձգտում է ապահովել պարզություն և խուսափել հակասական տերմինաբանություն օգտագործելիս թյուրըմբռնումներից։
Պաշտոնական հայտարարություններում և իր դիրքորոշումն արտահայտելիս՝ Լատվիան օգտագործում է միջազգայնորեն ճանաչված տերմինաբանություն։ Տարածաշրջանային տրանսպորտային կապի ներկայիս նախագծին և դրան առնչվող հարցերին վերաբերող ցանկացած պաշտոնական հղում հիմնված է Վաշինգտոնում 2025 թվականի օգոստոսի 8-ին ստորագրված վաշինգտոնյան համաձայնագրում («Թրամփի երթուղի՝ հանուն միջազգային խաղաղության և բարգավաճման») ամրագրված սահմանումների վրա։ Այս տերմինաբանությունն արտացոլում է Հայաստանի, Ադրբեջանի և միջազգային գործընկերների ընդհանուր ըմբռնումը։
Ադրբեջանում Լատվիայի դեսպան Էդգարս Սկույան արտահայտել է իր կարծիքը և նշել «Զանգեզուրի միջանցքը» որպես իրեն ընդունող երկրի հանրային դիսկուրսում օգտագործվող տերմիններից մեկը։
Լատվիան աջակցում է Հարավային Կովկասում տարածաշրջանային համագործակցությանը խթանող և կողմերի ինքնիշխանությունն ու տարածքային ամբողջականությունը հարգող տրանսպորտային և առևտրային կապերին՝ առանց միջամտելու նրանց ինքնիշխանությանը։ Մենք ողջունում ենք խաղաղության համաձայնագրի ուղղությամբ Հայաստանի և Ադրբեջանի ձեռնարկած դրական քայլերը»։
