Արևմուտքը փորձում է ՌԴ-ից անջատել Անդրկովկասի երկրները․ Լավրով
ՌԴ արտաքին գործերի նախարար Սերգեյ Լավրովն այսօր տեղի ունեցած մամուլի ասուլիսին անդրադարձել է Ադրկովկասին վերաբերող հարցերի։ «Комсомольская правда»-ի փոխանցմամբ՝ ՌԴ արտաքին գերատեսչության ղեկավարն ասել է, որ Արևմուտքը, սեփական կառույցներ ստեղծելով, փորձում է Ռուսաստանից անջատել Անդրկովկասի և Կենտրոնական Ասիայի երկրները։
Նա նշել է, որ ՆԱՏՕ-ն ու Եվրոպական Միությունը ստեղծում են գործակցության տարբեր կառույցներ Կենտրոնական Ասիայի և Անդրկովկասի երկրների հետ, և այդ կապերը փորձում են կիրառել ոչ թե փոխշահավետ գործակցության, այլ Ադրկովկասի երկրները Ռուսաստանից անջատելու համար։
«Անշուշտ, այդ միտումները ի չիք կդարձնենք հնարավոր բոլոր միջոցներով կամ հնարավորություններով՝ դիվանագիտական, քաղաքական և այլն»,- ասել է ՌԴ արտաքին գերատեսչության ղեկավարը։
