Վանաձորում «Թումո» կենտրոն կկառուցվի. Կառավարությունը տարածք նվիրաբերեց

Վանաձորի Թա­տերական փողոցի 1/1 սպայի տուն հասցեում գտնվող 2214․05 քառ. մետր ընդհա­­նուր մակերեսով շենք-շինությունները, ինչպես նաև դրանց զբաղեցրած, օգտա­գործման ու սպասարկման համար հատկացված հո­ղա­մասը Կառավարությունը նվիրաբերեց «Սիմոնյան կրթական հիմնադրամին»՝ «Թումո ստեղծարար տեխնոլոգիական կենտրոն» հիմնելու նպատակով։

Այդ մասին որոշման նախագիծը Կառավարության՝ նիստին ներկայացրեց ՀՀ տարածքային կառավարման և ենթակառուցվածքների նախարար Դավիթ Խուդաթյանը:

«Հիմնադրամը պատրաստվում է առաջիկա 3 տարիներին 1 մլրդ 800 մլն դրամի ներդրում իրականացնել այս տարածքում»,- ասաց նախարարը:

ԿԳՄՍ փոխնախարար Արթուր Մարտիրոսյանը նշեց,  որ այս պահին ՀՀ տարածքում կա 6 կենտրոն, Վանաձորինը 7-րդն է։

«Այս պահին «Թումո» կենտրոններ են գործում նաև Ալբանիայում, Գերմանիայում,  Ֆրանսիայում,  Պորտուգալիայում, Նիդեռլանդներում, Արգենտինայում և ԱՄՆ-ում, և պլանների մեջ է, որ առաջիկայում բացվեն նաև այլ երկրներում»,- ասաց Արթուր Մարտիրոսյանը։