Ռուսական հացահատիկով բեռնված վագոնները շուտով Ադրբեջանից կմտնեն Վրաստան, այնտեղից էլ՝ Հայաստան․ Ալեքսեյ Մելնիկով
Ռուսական հացահատիկով բեռնված վագոնները մոտակա ժամերին Ադրբեջանից կմտնեն Վրաստան, ապա՝ Հայաստան։ Այս մասին հայտարարել է «Հարավկովկասյան երկաթուղու» (ՀԿԵ, «Ռուսական երկաթուղիներ» ընկերության դուստր ձեռնարկություն) գլխավոր տնօրեն Ալեքսեյ Մելնիկովը Երևանում կայացած մամուլի ասուլիսում։
ՀԿԵ ղեկավարը վստահություն է հայտնել, որ երկաթուղու համար շատ կարևոր, գործնականում նոր զարգացում է տեղի ունենում։
Անդրադառնալով Ղազախստանից հացահատիկի ներմուծմանը ՀՀ՝ ՀԿԵ ղեկավարը նշել է, որ այն «այսօր Ռուսաստանից կմտնի Ադրբեջան, իսկ առաջիկա մի քանի օրերի ընթացքում կհասնի Հայաստան»։
«Մենք շատ ենք սպասում դրան։ Մեզ համար՝ որպես երկաթուղային աշխատողների, սա շատ կարևոր իրադարձություն է, այդ թվում՝ այն փաստը, որ մենք այժմ կարող ենք բեռներ հասցնել Հայաստան Ղազախստանից, այլ երկրներից, Ռուսաստանի Դաշնությունից և նույնիսկ կազմակերպել կոնտեյներային բեռնափոխադրումներ Չինաստանից», – նշել է նա։
«Հարավային երկաթուղի» ընկերության ղեկավարը վստահություն է հայտնել, որ երթուղին անկասկած պահանջարկ կունենա։ «Սա նաև կնվազեցնի Վերին Լարսի անցակետում կուտակումները և Սև ծովի հատվածով առաքման արժեքը, որն, ինչպես բոլորս գիտենք, բավականին թանկ է», – նշել է Մելնիկովը։ Նա հավելել է, որ երթուղին պահանջարկ կունենա նաև նավթամթերք ներմուծող ընկերությունների համար։
