ՍԱՏՄ-ն փորձաքննության է ենթարկել ադրբեջանական ճանապարհով ներմուծված ալյուրը
Սննդամթերքի անվտանգության տեսչական մարմինը փորձաքննության է ենթարկել ՌԴ-ից և Ղազախստանից Ադրբեջանի ճանապարհով ներմուծված ալյուրը։
ՍԱՏՄ-ից տեղեկացնում են, որ փորձարկումներն իրականացվել են երեք ուղղություններով՝
1․ Բուսասանիտարական փորձարկումներ՝ համաձայն Մաքսային Միության հանձնաժողովի 2010 թվականի հունիսի 18-ի թիվ 318 որոշմամբ հաստատված «Եվրասիական տնտեսական միությունում բույսերի կարանտինի ապահովման մասին» պահանջների,
2․ անվտանգության ցուցանիշների փորձարկումներ՝ համաձայն Մաքսային Միության «Հացահատիկի անվտանգության մասին» 015/2011 տեխնիկական կանոնակարգի պահանջների,
3․ որակի ցուցանիշների փորձարկումներ՝ համաձայն ԳՈՍՏ 9353-2016 «Ցորեն․ տեխնիկական պայմաններ» ստանդարտի պահանջների:
Արդյունքում վնասակար օգանիզմներ չեն հայտնաբերվել, թունավոր տարրեր, ծանր տարրեր և այլ նյութերի սահմանային թույլատրելի խտություններից շեղումներ չեն արձանագրվել։
«Որակի ցուցանիշների լաբորատոր հետազոտությունները դեռ ընթացքում են, արդյունքները կհրապարակվեն պատրաստ լինելուն պես»,- հայտնել են ՍԱՏՄ-ից:
