Ղրղզստանի իշխանություններն արգելել են կրիպտոարժույթների մայնինգն էլեկտրաէներգիայի սակավության պատճառով
Ղրղզստանի իշխանությունները մինչև մարտի վերջ արգելել են կրիպտոարժույթների մայնինգով զբաղվողների գործունեությունը։ Այս մասին, ինչպես հայտնում է interfax.kz-ն, հայտարարել է երկրի ազգային անվտանգության պետական կոմիտեի ղեկավար Կամչիբեկ Տաշիևը։
Նա հավելել է, որ որոշումը կայացվել է Ղրղզստանի էներգետիկայի նախարար Տաալայբեկ Իբրայևի հետ համատեղ։
«Եթե որևէ մեկը փորձի միացնել դրանք, նրանք կենթարկվեն քրեական պատասխանատվության»,- նշել է Տաշիևը։
Նա վստահեցրել է, որ երկիրը չի պլանավորում էլեկտրաէներգիայի անջատումներ։
«Այնուամենայնիվ, եկեք զգույշ լինենք և խնայենք։ Մենք կոչ ենք անում բոլորին չվատնել էլեկտրաէներգիան։ Այո՛, այս տարի ջուրը քիչ է, և արտադրությունը նվազել է, բայց մենք կանենք ամեն ինչ, որպեսզի հաջողությամբ հաղթահարենք ձմեռը», – ասել է նա։
