Չեմ կարծում՝ Օսկանյանի առաջարկը կընդունեն, բայց Արցախի հարցում վիճակն անելանելի չէ․ Սերժ Սարգսյան
ՀՀ երորրդ նախագահ Սերժ Սարգսյանը դատարանի բակում, լրագրողների հետ զրույցում անդրադարձել է Ադրբեջանի հետ բանակցություններին ու նախկին արտգործնախարար Վարդան Օսկանյանի առաջարկներին։
«Ես կարծում եմ, որ վիճակն անելանելի չէ, դեռ հնարավոր է ինչ-որ բան փոխել։ Երեկ Վարդան Օսկանյանի առաջարկություններն էլ ես կարծում եմ՝ տրամաբանական են և իրականացնելի»,- նշել է Սերժ Սարգսյանը։
Ըստ նրա՝ լավագույն տարբերակը կլիներ Նիկոլ Փաշինյանի հրաժարականը, սակայն հնարավոր է նաև այլ լուծում մտածել․
«Կարելի է խումբ կազմել Վարդան Օսկանյանի գլխավորությամբ, բայց պայմանով, որ այո, նրանք այդ ամբողջ ընթացքում պետք է լռեն և վստահեն կազմված խմբին։ Սակայն ես չեմ կարծում, որ այդ մարդիկ ունակ են նման մի համաձայնության գալու»,- ասել է երրորդ նախագահը։
Հիշեցնենք, որ ՀՀ նախկին արտգործնախարար Վարդան Օսկանյանը երեկ հայտարարել էր, որ հնարավոր է Արցախի հարցում փրկել իրավիճակը։ Նա հայտարարել էր, որ պատրաստ է բանակցություններում երկու-երեք ամսում կտրուկ իրավիճակ փոխելու պատասխանատվություն ստանձնել՝ նախապայմանով որ Փաշինյանը լռի, ուղղակի չխոսի ո՛չ ԱԺ-ում, ո՛չ կառավարությունում, ո՛չ որևէ տեղ:
