ԱՄՆ-ն բարձրաձայնում է Ուկրաինայի հետ բանակցություններում առաջընթացի մասին, մինչդեռ աղբյուրը բացահայտում է էական խոչընդոտներ․ CNN

Կիևը պատրաստ է համաձայնել ԱՄՆ խաղաղության ծրագրի կետերի մեծ մասին` բացառությամբ երեք հիմնականի: Դեռևս կան զգալի տարբերություններ այն բանի միջև, թե ինչ է Թրամփի վարչակազմը պահանջում Ուկրաինայից, և ինչ են պատրաստ ընդունել Կիևի իշխանությունները․ հայտնում է CNN-ը՝ հղում անելով բանակցություններին ծանոթ ուկրաինական բարձրաստիճան աղբյուրի։

Աղբյուրը հաստատել է, որ անցյալ շաբաթ արտահոսած 28 կետից բաղկացած ԱՄՆ խաղաղության առաջարկներում նշված կետերի մեծ մասի շուրջ իսկապես «կոնսենսուս» է ձեռք բերվել։

Սակայն աղբյուրը նշել է, որ դեռևս կա առնվազն երեք կարևոր ոլորտ, որտեղ էական տարաձայնություններ են մնում՝ տարաձայնություններ, որոնք կարող են նպաստել կամ խափանել հակամարտության ավարտի բանակցությունների ջանքերը։ Նախ՝ զգայուն հարցն այն է, թե Ուկրաինան կհանձնի՞ արդյոք երկրի արևելքում գտնվող Դոնբասի շրջանի հիմնական տարածքները, այդ թվում՝ Ուկրաինայի անվտանգության համար կենսական նշանակություն ունեցող խիստ պաշտպանված քաղաքներից և գյուղերից կազմված «պաշտպանական գոտին»։

Ուկրաինացի աղբյուրը CNN-ին հայտնել է, որ այդ առաջարկի վերաբերյալ «որոշակի առաջընթաց» է գրանցվել, բայց դեռևս որոշում չի կայացվել առաջարկների նախագծերի բովանդակության կամ ձևակերպումների վերաբերյալ։

«Շատ սխալ կլինի ասել, որ մենք այժմ ունենք այն տարբերակը, որն ընդունվել է Ուկրաինայի կողմից», – հավելել է աղբյուրը։

Երկրորդ՝ դեռևս քննարկվում է նաև ԱՄՆ-ի վիճահարույց առաջարկը՝ սահմանափակել Ուկրաինայի զինված ուժերի թիվը մինչև 600,000։ Այժմ քննարկումներ են ընթանում նոր, ավելի բարձր թվի շուրջ, բայց Կիևը դեռևս ցանկանում է հետագա փոփոխություններ, նախքան նման սահմանափակումներին համաձայնվելը։

Վերջապես, Ուկրաինայի՝ ՆԱՏՕ-ի անդամ դառնալու ձգտումից հրաժարվելու հարցի վերաբերյալ աղբյուրը CNN-ին հայտնել է, որ այս պահանջը մնում է անընդունելի։ Նման զիջումը կստեղծի «վատ նախադեպ» և փաստորեն Ռուսաստանին կտա վետոյի իրավունք արևմտյան ռազմական դաշինքի նկատմամբ այն պարագայում, երբ «նույնիսկ դաշինքի անդամ չէ»։