Ադրբեջանի իշխանությունները պետք է անհապաղ դադարեցնեն անկախ ձայների նկատմամբ անողոք ճնշումներն ինչպես երկրի ներսում, այնպես էլ արտերկրում․ HRW

Ադրբեջանի իշխանությունները սաստկացնում են իրենց արշավն արտասահմանում անկախ և քննադատական ձայների դեմ՝ կալանքի օրդերներ տալով աքսորված լրագրողների, ակտիվիստների և վերլուծաբանների համար։ Դրանք, կարծես թե, քաղաքական դրդապատճառներ ունեն։ Այս քայլերը համապատասխանում են այլախոհությունը ճնշելու և խոսքի ազատությունը սահմանափակելու երկարատև ջանքերի օրինաչափությանը՝ թե՛ Ադրբեջանի ներսում, թե՛ նրա սահմաններից դուրս։ Այս դեպքերն արտացոլում են իշխանությունների կողմից քրեական արդարադատության համակարգի չարաշահման երկարատև պրակտիկան՝ քննադատներին լռեցնելու համար. գրել է Human Rights Watch միջազգային իրավապաշտպան կազմակերպությունը։

Ինչպես նշվել է, 2023 թվականի նոյեմբերից ի վեր Ադրբեջանի իշխանությունները ձերբակալել են լրագրողների, քաղաքական ակտիվիստների, իրավունքների պաշտպանների և գիտնականների՝ կեղծ ֆինանսական և այլ քրեական մեղադրանքներով, այդ թվում՝ անօրինական ձեռնարկատիրության, փողերի լվացման, հարկերից խուսափելու և փաստաթղթերի կեղծման մեղադրանքներով։

Արտերկրում գտնվող ադրբեջանցիներին թիրախավորելու վերջին ալիքը հաջորդում է 2025 թվականի մարտին մի քանի աքսորված բլոգերների դեմ բազմաթիվ քրեական հետաքննություններին, որոնց մեղադրում էին խարդախության, ահաբեկչության, անկարգությունների հրահրման, պաշտոնական հրամաններին չենթարկվելու և հեղաշրջման փորձի մեջ։ Այդ ժամանակվանից ի վեր դատարանները բազմաթիվ կալանքի օրդերներ են տվել և հեռակա դատապարտումներ են կայացրել։ Վերջերս՝ սեպտեմբերին, դատարանը Ֆրանսիայում բնակվող բլոգեր Մահամմադ Միրզալիին հեռակա կարգով դատապարտել է 6.5 տարվա ազատազրկման՝ մի քանի մեղադրանքներով, այդ թվում՝ զանգվածային անկարգություններ հրահրելու համար։

Ադրբեջանի իշխանությունները պետք է անհապաղ վերացնեն բոլոր քաղաքական դրդապատճառներով մեղադրանքները, դադարեցնեն անկախ ձայների նկատմամբ անողոք ճնշումներն ինչպես երկրի ներսում, այնպես էլ արտերկրում և կատարեն իրենց միջազգային պարտավորությունները՝ հարգելու խոսքի և միավորումների ազատությունը։