Պուտինն ՀԱՊԿ ուժերը ժամանակակից ռուսական զենքերով զինելու ծրագիր է առաջարկել

ՌԴ նախագահ Վլադիմիր Պուտինը Բիշքեկի գագաթնաժողովում խոսել է Հավաքական անվտանգության պայմանագրի կազմակերպությունում Ռուսաստանի նախագահության առաջնահերթությունների մասին։

ՌԴ ղեկավարը հայտնել է, որ 2026 թվականի հունվարի 1-ից սկսած Ռուսաստանը կստանձնի ՀԱՊԿ-ի նախագահությունը։ Այն կանցկացվի «Հավաքական անվտանգություն բազմաբևեռ աշխարհում» կարգախոսի ներքո։

Մոսկվան կշարունակի ամրապնդել կազմակերպության պաշտպանական ներուժը և առաջարկում է մեկնարկել ՀԱՊԿ ուժերը ժամանակակից ռուսական զենքերով զինելու ծրագիր։ Դրանք ապացուցել են իրենց արդյունավետությունը մարտական գործողությունների ժամանակ։

«Մենք մտադիր ենք հատուկ շեշտը դնել պաշտպանական արդյունաբերության ձեռնարկությունների միջև համագործակցության խորացման վրա», – նշել է Պուտինը։ Նրա խոսքով՝  կազմակերպության ավիացիոն ուժերի և հակաօդային պաշտպանության համակարգերի զարգացումը պահանջում է զգալի ուշադրություն։ Ռուսաստանը նախատեսում է համատեղ վարժանքներ անցկացնել զորամասերի և հատուկ ծառայությունների համար։

Մոսկվան կամրապնդի թմրանյութերի ապօրինի շրջանառության դեմ պայքարը, կմշակի հակաահաբեկչական նոր ռազմավարություն և կօգնի օգտագործել ռազմական բժշկության նվաճումները։ ՌԴ նախագահն առաջարկել է նոր միջոցներ ձեռնարկել տեղեկատվական ոլորտում սպառնալիքներից պաշտպանվելու համար։ Կարևոր է նաև խաղաղապահ ուժերի տեղակայման մեխանիզմի կատարելագործումը։ Պուտինը կոչ է արել հաջորդ տարի անցկացնել միջազգային փորձագիտական ֆորում՝ նվիրված հավասար անվտանգության ճարտարապետության ստեղծմանը: ՀԱՊԿ-ի հաջորդ գագաթնաժողովը տեղի կունենա 2026 թվականի նոյեմբերի 11-ին Մոսկվայում։

Իր հերթին՝ Ղրղզստանի նախագահ Սադիր Ջապարովը հայտարարել է, որ 2025 թվականի համար նախատեսված ՀԱՊԿ միջոցառումները հաջող են եղել: Բելառուսի նախագահ Ալեքսանդր Լուկաշենկոն կազմակերպությանը կոչ է արել արձագանքել Եվրոպայում ռազմականացմանը։

Բելառուսի պաշտպանության նախարար Վիկտոր Խրենինը հայտարարել է, որ ՀԱՊԿ-ը մնում է արդիական և կարող է արագ արձագանքել երկրները ներսից ոչնչացնելուն ուղղված մարտահրավերներին։