Ադոլֆ Հիտլերը 5-րդ անընդմեջ հաղթանակն է տարել Նամիբիայի ՏԻՄ ընտրություններում

Ադոլֆ Հիտլեր Ուունոնա անունով նամիբիացի քաղաքական գործիչը 5-րդ անընդմեջ հաղթանակն է տոնել տեղական ինքնակառավարման մարմինների ընտրություններում․ գրում է Euronews-ը։

Նացիստական ​​Գերմանիայի հայտնի առաջնորդի անունը կրող քաղաքական գործիչը Նամիբիայի հյուսիսում գտնվող Օշանա շրջանի Օմպունջա համայնքի ղեկավարն է։

Նամիբիայի ընտրական հանձնաժողովը դեռևս չի հրապարակել ձայների պաշտոնական հաշվարկի արդյունքերը, սակայն ըստ բազմաթիվ հաղորդագրությունների՝ Ուունոնան վճռական հաղթանակ է տարել։

Նշվում է, որ չնայած իր անվանակցի վատ համբավին՝ 59-ամյա պաշտոնյան մեծ ժողովրդականություն է վայելում 5000-ից պակաս բնակչություն ունեցող շրջանում։

2020 թվականին գերմանական Bild թերթին տված հարցազրույցում Ուունոնան ասել է, որ ինքը «ոչ մի կապ չունի» նացիստական ​​գաղափարախոսության հետ՝ մերժելով համաշխարհային գերիշխանության ցանկացած գաղափար։

«Միայն մեծանալուց հետո հասկացա. այս մարդը ցանկանում էր իրեն ենթարկեցնել ամբողջ աշխարհը», – ասել է Ուունոնան՝ հավելելով, որ ինքը ոչ մի կապ չունի այդ ամենի հետ։

Ըստ Ուունոնայի՝ հայրն իրեն անվանել է Ադոլֆ Հիտլերի անունով, սակայն «նա, հավանաբար, չէր հասկանում», թե ինչ է դա նշանակում։

«Երեխա ժամանակ ես դա համարում էի լիովին նորմալ անուն։ Դա չի նշանակում, որ ես ունեմ Ադոլֆ Հիտլերի բնավորությունը կամ նման եմ Գերմանիայի Ադոլֆ Հիտլերին»,- ասել է Ուունոնան նամիբիական մամուլին տված հարցազրույցում։

Պաշտոնյան, սակայն, չի պատրաստվում փոխել իր անունը, քանի որ ըստ նրա՝ «դրա համար շատ ուշ է»։