Կոչ եմ անում կենտրոնանալ ռուսական սառեցված ակտիվների վրա, որ պահվում են ոչ միայն Բելգիայում, այլև մյուս երկրներում․ Իտալիայի վարչապետ
Ըստ Իտալիայի վարչապետ Ջորջա Մելոնիի՝ բեռլինյան բանակցությունները, որտեղ քննարկվել է Ուկրաինայում պատերազմը դադարեցնելու հարցը, հաջողված էին։ «Էական առաջընթաց է գրանցվել Ուկրաինայի համար անվտանգության հավելյալ երաշխիքներ ունենալու հարցում»,- Reuters-ի փոխանցմամբ՝ ասել է նա։
Ջորջա Մելոնին նշել է, որ Եվրոպայի խորհուրդը պետք է շարունակի ֆինանսավորել Կիևին, բայց նաև ընդգծել է, որ Հռոմը չի պատրաստվում զինվորներ ուղարկել Ուկրաինա։
Միևնույն ժամանակ Մելոնին հայտարարել է, որ Ռուսաստանը հակամարտության կարգավորման համար առաջ է քաշում չափազանց «անհիմն» պահանջներ։ «Պետք է գտնել օրինական մեխանիզմներ` ռուսական սառեցված ակտիվներն օգտագործելու և դրանցով Ուկրաինային վարկ տրամադրելու համար։ Դրանք, ի դեպ, պահվում են ոչ միայն Բելգիայում, այլև ԵՄ այլ երկրներում»,- ասել է Իտալիայի կառավարության ղեկավարը։
Ավելի վաղ ԶԼՄ-ները գրել էին, որ ԵՄ որոշ երկրներ դեմ են ծրագրին, որով նախատեսվում է ռուսական ակտիվների հաշվին վարկ տրամադրել Կիևին։
