Պետք է հասկանալ՝ ԽՍՀՄ ԿԳԲ-ի հետ նախկինում համագործակցողը երկրին օգո՞ւտ է տվել, թե՞ վնաս․ Սերժ Սարգսյանը՝ ԱԱԾ հրապարակած թղթի մասին
Խորհուրդ եմ տալիս լուրջ չվերաբերվել իշխանության ներկայացուցիչների հայտարարություններին, հիշո՞ւմ եք 10 մլն ծառի պատմությունը, 44-օր հաղթում ենքը և այդպիսի 10, 15, 20, 30 պատմություն կարող եմ բերել․ այսպես է արձագանքել ՀՀ երրորդ նախագահ Սերժ Սարգսյանը՝ Ադրբեջանից բենզին ներմուծելու և շուկան դիվերսիֆիկացնելու մասին իշխանության հայտարարություններին։
«Դիվերսիֆիկացիան այլ հասկացություն է, թող փորձեն, կտեսնենք»,- դատարանի բակում լրագրողներին ասել է Սերժ Սարգսյանը։
Նա նշել է, թե ծանոթ չէ Էդմոն Մարուքյանի՝ համախմբվելու մասին հայտարարությանը, փոխարենն այդ հարցով քննարկում է ունեցել «Հայաստան» խմբակցության պատգամավոր, ՀՅԴ ԳՄ Ներկայացուցիչ Իշխան Սաղաթելյանի հետ։
«Նրա հետ հանդիպել եմ, քննարկել ենք դրույթները, որոնք նաև նա շարադրել է գրավոր, վաղուց ծանոթ եմ։ Կարևորը հայտարարություն անելը չէ, կարևորն այն է, որ բոլորը գիտակցեն, որ տակից, կողքից կամ բացահայտ իրար չքննադատեն, թե չէ եթե առավոտից երեկո պետք է մեզ քննադատեն, գնանք էդ մարդկանց հետ ի՞նչ խոսենք»,- ասել է Սարգսյանը։
Երրորդ նախագահն անդրադարձել է նաև ԱԱԾ հրապարակած փաստաթղթին, ըստ որի՝ Գարեգին Բ կաթողիկոսի եղբայրը՝ Եզրաս արքեպիսկոպոս Ներսիսյանը, ԽՍՀՄ ԿԳԲ-ի գործակալ է եղել։
«Ես այդպիսի տվյալներ չունեմ, այդպիսի ինֆորմացիայի չեմ ծանոթացել ո՛չ ԱԱԾ ղեկավար եղած ժամանակ, ո՛չ նախագահ եղած ժամանակ։ Ընդհանրապես նախկին ծառայակիցներս կարող են հավաստել՝ երբեք չեմ հետաքրքրվել, թե ով է համագործակցում ԱԱԾ-ի հետ, առավել ևս՝ ով է համագործակցել ԽՍՀՄ ՊԱԿ-ի հետ կամ հատուկ ծառայությունների հետ։
Դրա իմաստը չեմ տեսնում, ենթադրենք՝ մեկը համագործակցել է ԽՍՀՄ ծառայությունների հետ, բայց նրանք, ովքեր դա բացասական բան ենք համարում, արդյոք գիտեն՝ ո՞ր ուղղությամբ է համագործակցել, իսկ եթե կոնկրետ հետախուզության ուղղությամբ է համագործակցել, երկրին օգո՞ւտ է բերել, թե՞ վնաս է տվել։ Պետք է հասարակությանը ծանոթացնել շատ նրբերանգների, եթե դա չի լինում, ուրեմն այլ, ոչ այնքան լեգիտիմ նպատակ է հետապնդում»,- ասել է նա։
Անդրադառնալով Կայա Կալասի՝ ընտրությունների նախաշեմին ՀՀ-ին օգնություն տրամադրելու մասին հայտարարությանը՝ Սերժ Սարգսյանն արձագանքել է․ «Կալասը հայտարարեր, թե ոչ, մենք տեսնում ենք եվրոպական կառույցների բացահայտ աջակցությունն այսօրվա կառավարիչներին»։
