Եկեղեցի-պետություն դիմակայությունը կարող է վերաձևավորել Հայաստանի քաղաքական լանդշաֆտը և սփյուռքի հետ հարաբերությունները․ RFE/RL

Հայաստանը կանգնած է անկախություն ձեռք բերելուց ի վեր եկեղեցի-պետություն ամենածանր բախման առջև, քանի որ լարվածությունը շարունակում է աճել Նիկոլ Փաշինյանի և Հայ առաքելական եկեղեցու ղեկավար Գարեգին Բ կաթողիկոսի միջև․ գրում է Radio Free Europe/ Radio Liberty-ն։

Ինչպես նշվում է, վեճը հանգեցրել է ձերբակալությունների, հրապարակային մեղադրանքների և Հայաստանի ինքնության, կառավարման, աշխարհաքաղաքական կողմնորոշման, ինչպես նաև վարչապետի կողմից երկրի սահմանադրության նկատմամբ հարգանքի վերաբերյալ հակասական վարկածների։

Այս դիմակայությունը կարող է վերաձևավորել Հայաստանի քաղաքական լանդշաֆտը և սփյուռքի հետ հարաբերությունները՝ հաջորդ տարվա հունիսին կայանալիք խորհրդարանական ընտրություններից առաջ։ Եկեղեցու և պետության միջև դիմակայությունը տեղի է ունենում Հայաստանի համար զգայուն ժամանակահատվածում, քանի որ երկիրը մոտենում է հունիսին կայանալիք խորհրդարանական ընտրություններին։

Կառավարության գործողությունների քննադատները նշում են, որ հոգևորականների ձերբակալությունները և եկեղեցու նկատմամբ հետաքննությունները խախտում են եկեղեցու և պետության սահմանադրական բաժանումը։

Մեկ այլ զգայուն թեմա է Հայաստանի և Ադրբեջանի միջև խաղաղության համաձայնագիրը։ Չնայած երկու երկրների ղեկավարներն օգոստոսին նախաստորագրել են խաղաղության համաձայնագրի նախագիծը, ամբողջական պայմանագիրը դեռևս պաշտոնապես չի ստորագրվել կամ վավերացվել։

Սակայն վարչապետը չի թուլացրել ճնշումը՝ վերջերս հաստատելով, որ ինքը հրահանգել է Ազգային անվտանգության ծառայությանը գրաքննել եկեղեցական ծառայությունները՝ քահանաներին հրահանգելով չհիշատակել Գարեգին Բ-ի անունը պատարագների ժամանակ։