Եվրոպական մի շարք երկրներ առատ տեղումների պատճառով չեղարկել կամ հետաձգել են չվերթները 

Եվրոպական մի շարք երկրներում տեղացած առատ ձյունը խափանումներ է առաջացրել ավիափոխադրողների աշխատանքում։

Որոշ օդանավակայաններում չվերթները կա՛մ չեղարկվել են, կա՛մ հետաձգվել։ Իրավիճակը հատկապես բարդ է Մեծ Բրիտանիայում, Նիդերլանդներում և Ֆրանսիայում։

Ֆրանսիական իշխանությունները ձյան տեղումների և մերկասառույցի պատճառով տագնապի նարնջագույն մակարդակ են հայտարարել 26 դեպարտամենտում։ Ֆրանսիայի որոշ շրջաններում՝ արևմտյան ափի և Իլ դը Ֆրանս շրջանի միջև, սպասվում է մինչև 15 սմ ձյուն։ Ֆրանսիայի քաղաքացիական ավիացիայի վարչությունը խնդրել է ավիաընկերություններին 15%-ով կրճատել Փարիզից չվերթները՝ եղանակային պայմանների պատճառով։

Ավիափոխադրումների խափանումները շարունակվում են նաև Նիդեռլանդներում։ Ամստերդամի մոտ գտնվող Սխիպհոլ միջազգային օդանավակայանում KLM-ն չեղարկել է երեքշաբթի օրվա համար նախատեսված առնվազն 300 չվերթ։