Ֆերմերները տրակտորներով գրոհել են Փարիզը

Ֆրանսիացի ֆերմերները մոտ 100 տրակտորով փորձել են ներխուժել Փարիզի կենտրոն․ գրում է Euronews-ը։

Ֆերմերները բողոքում են Հարավային Ամերիկայի երկրների հետ (Մերկոսուր) ազատ առևտրի համաձայնագիրը ստորագրելու ԵՄ մտադրության դեմ։

Ֆրանսիայի ներքին գործերի նախարարությունը հայտնել է, որ մոտ 20 տրակտոր կարողացել է անցնել ոստիկանական արգելապատնեշները՝ մտնելով մայրաքաղաքի կենտրոն։

Նշվում է, որ տրակտորներից մի քանիսը գտնվում է Հաղթանակի կամարի մոտ, իսկ մյուսները՝ Էյֆելյան աշտարակի առջև։

Բողոքի ցույցը կազմակերպել է Գյուղական համակարգման միությունը՝ Ֆրանսիայի կառավարության վրա ճնշում գործադրելու նպատակով։

Ֆերմերները դեմ են Բրազիլիան, Արգենտինան, Բոլիվիան, Պարագվայը և Ուրուգվայը ներառող առևտրային համաձայնագրին և պնդում են, որ այն կվնասի իրենց ապրուստին: