Թրամփը սպառնում է ցամաքային գործողություններ սկսել կարտելների դեմ, որոնք կառավարում է Մեքսիկան
ԱՄՆ նախագահ Դոնալդ Թրամփը հայտարարել է, որ իր վարչակազմը շուտով կսկսի ցամաքային գործողություններ նարկոկարտելների դեմ․ գրում է CNN-ը։
Թրամփն այս հայտարարությունն արել է Վենեսուելայի նախագահին թմրանյութերի ապօրինի շրջանառության մեղադրանքով ձերբակալելու գործողությունից և Կարիբյան ավազանում ու Խաղաղ օվկիանոսի արևելքում թմրանյութերի հետ կապված ենթադրյալ նավերի վրա ամիսներ տևած հարվածներից հետո։
«Մենք վերացրել ենք ջրային ճանապարհով ներմուծվող թմրանյութերի 97%-ը, և հիմա պատրաստվում ենք ցամաքային գործողություններ սկսել կարտելների դեմ պայքարում»,- ասել է Թրամփը Fox News-ի եթերում։
«Կարտելները կառավարում են Մեքսիկան: Չափազանց տխուր է տեսնել, թե ինչ է պատահել այդ երկրի հետ»,- հավելել է Թրամփն՝ այլ մանրամասներ չհայտնելով։
Շաբաթվա սկզբին նա հայտարարել էր, որ հարցրել է Մեքսիկայի նախագահ Կլաուդիա Շեյնբաումին՝ նա ցանկանո՞ւմ է արդյոք ԱՄՆ զինվորականների օգնությունը թմրամիջոցների կարտելների դեմ պայքարում՝ նախազգուշացնելով, որ «Մեքսիկան պետք է վերահսկողություն ստանձնի իրավիճակի նկատմամբ»։
Շեյնբաումը չի ընդունել ԱՄՆ նախագահի առաջարկը՝ Վենեսուելայում ԱՄՆ գործողությունից հետո լրագրողներին ասելով. «Մենք կտրականապես մերժում ենք այլ երկրների ներքին գործերին միջամտությունը»։
