Դատարանը չի կարող միջամտել Եկեղեցու ներքին կանոնակարգումներին․ փաստաբանը՝ Մայր Աթոռի դեմ եպիսկոպոս Սարոյանի ներկայացրած հայցի մասին
Գևորգ եպիսկոպոս Սարոյանի՝ Մասյացոտնի թեմի առաջնորդի պաշտոնից իրեն հեռացնելու վերաբերյալ ներկայացված հայցն իրավական տեսանկյունից քիչ հավանական է, որ դատարանը բավարարի․ ABC Media-ի հետ զրույցում նշեց փաստաբան Մարինե Ֆարմանյանը։
Փաստաբանի խոսքով՝ նման գործընթացը հակասում է Սահմանադրությանը, քանի որ այն հստակ սահմանում է Եկեղեցու և պետության բաժանումը, և աշխարհիկ իշխանությունը չի կարող միջամտել Եկեղեցու ներքին կառավարմանն ու կանոնակարգումներին։
«Խոսքը չի վերաբերում սովորական աշխատանքային հարաբերություններին։ Հոգևորականի գործունեությունը կարգավորվում է Եկեղեցու ներքին կանոններով, ոչ թե աշխատանքային օրենսգրքով։ Այդ պատճառով դատարանն իրավական հիմք չունի քննարկելու Վեհափառ Հայրապետի նման որոշումները»,- նշեց Ֆարմանյանը։
Նա ընդգծեց, որ Մայր Աթոռում աշխատում են նաև աշխարհիկ անձինք, որոնց հետ Եկեղեցին ունի աշխատանքային իրավահարաբերություններ, և նման դեպքերում հնարավոր է դիմել դատարան։ Սակայն տվյալ դեպքում հարցը վերաբերում է հոգևոր թեմի առաջնորդությանը, ինչը բացառապես Եկեղեցու ներքին իրավասության շրջանակում է։
«Եթե այս տրամաբանությամբ փորձենք Վեհափառ Հայրապետի որոշումները վարչական դատարանում վիճարկել, կստացվի իրավական աբսուրդ»,- ասաց փաստաբանը։
Ավելի վաղ հաղորդվել էր, որ Գևորգ եպիսկոպոս Սարոյանը հայց է ներկայացրել դատարան ընդդեմ Հայաստանյայց Առաքելական Սուրբ եկեղեցու։
