Չինաստանի բնակչությունը նվազում է չորրորդ տարին անընդմեջ
Չինաստանի բնակչությունը 2025 թվականին նվազել է չորրորդ տարին անընդմեջ․ գրում է BBC-ն։
Երկրում ծնելիության մակարդակը հասել է ռեկորդային ցածր մակարդակի՝ չնայած խնդիրը լուծելու կառավարության մի շարք միջոցառումներին։ Նշվում է, որ ծնելիությունը ռեկորդային ցածր ցուցանիշ է գրանցել 1949 թվականին Կոմունիստական կուսակցության իշխանության գալուց ի վեր, մինչդեռ մահացության մակարդակը բարձրացել է։
Երկուշաբթի հրապարակված կառավարության տվյալները ցույց են տվել, որ երկրի բնակչությունը նվազել է 3.39 միլիոնով՝ 2025 թվականի վերջին հասնելով 1.4 միլիարդի, ինչը նախորդ տարվա համեմատ անկման ավելի մեծ ցուցանիշ է։
Ծերացող հասարակության խնդիրը լուծելու նպատակով Պեկինը մեծ ջանքեր է գործադրում երիտասարդներին խրախուսելու ամուսնանալ և երեխաներ ունենալ։
2016 թվականին այն չեղարկեց «մեկ երեխայի» քաղաքականությունը՝ այն փոխարինելով երկու երեխա ունենալու սահմանափակմամբ։ Երբ դա չհանգեցրեց ծնունդների կայուն աճի, իշխանությունները հայտարարեցին, որ 2021 թվականից կթույլատրեն ունենալ մինչև երեք երեխա։
2025 թվականին կառավարությունն առաջարկել է տարեկան 3600 յուան (500 դոլար) մինչև 3 տարեկան յուրաքանչյուր երեխայի համար: Որոշ նահանգներ նաև տրամադրում են լրացուցիչ ֆինանսական աջակցություն և ավելի երկար մայրական արձակուրդ:
Չինաստանն աշխարհում ամենացածր ծնելիության մակարդակն ունեցող երկրներից է՝ մեկ կնոջ հաշվով մոտ մեկ ծնունդ։ Տարածաշրջանի այլ երկրներում, ինչպիսին են Հարավային Կորեան, Սինգապուրը և Թայվանը, ծնելիության մակարդակը նույնպես ցածր է:
Ըստ Պեկինի YuWa բնակչության հետազոտությունների ինստիտուտի 2024 թվականի զեկույցի՝ Չինաստանը երեխա մեծացնելու համար ամենաթանկ երկրներից է։
Նշվում է, որ բնակչության թվի նվազումը տնտեսական և սոցիալական հետևանքներ է ունենում աշխարհի երկրորդ խոշորագույն տնտեսության համար՝ սրելով արդեն իսկ նվազող աշխատուժի խնդիրը։
Քանի որ ավելի ու ավելի շատ երիտասարդներ են նախընտրում ծնողներից առանձին ապրել, աճում է նաև այն տարեցների թիվը, որոնք ստիպված են իրենք իրենց մասին հոգ տանել կամ հույսը դնել պետական աջակցության վրա։
Սակայն, ըստ Չինաստանի սոցիալական գիտությունների ակադեմիայի, կենսաթոշակային ֆոնդը սպառվում է, և երկիրը ժամանակ չի գտնում բավարար միջոցներ հավաքելու իր տարեց բնակչությանը հոգ տանելու համար։
