Բազմացման ժամանակացույցի փոփոխություններ․ պինգվինները ստիպված են գնալ ծայրահեղ քայլերի՝ կլիմայական ճգնաժամին հարմարվելու համար
Անտարկտիդայում պինգվինների բազմացման շրջանը 14 օրով ավելի շուտ է սկսվել՝ մտահոգություն առաջացնելով գիտնականների շրջանում․ գրում է Euronews-ը։
Նշվում է, որ պինգվինները ստիպված են գնալ ծայրահեղ քայլերի՝ կլիմայական ճգնաժամին հարմարվելու համար։
Պինգվինների այնպիսի տեսակներ, ինչպիսիք են Ադելին, Չինստրապը և Ջենտուն, ապրում են Երկրի վրա ամենաարագ տաքացող վայրերից մեկում, որտեղ ջերմաստիճանը բարձրանում է մինչև չորս անգամ ավելի արագ, քան Անտարկտիդայի միջին ցուցանիշը։
Գիտնականները ուսումնասիրել են պինգվինների բազմացման ժամանակացույցի փոփոխությունները 2012-2022 թվականների ընթացքում։ Արդյունքները ցույց են տվել, որ պինգվինների երեք տեսակների դեպքում էլ բազմացման շրջանի ժամանակացույցը փոփոխվել է ռեկորդային տեմպերով. որոշ գաղութներում բազմացման շրջանը սկսվում է 13 օր առաջ, իսկ որոշներում՝ նույնիսկ 24 օր առաջ։
«Նույնիսկ լավագույն դեպքում պարզ չէ, թե որքան ճկուն կկարողանան գտնվել այս տեսակները, եթե ջերմաստիճանը շարունակի բարձրանալ ներկայիս տեմպերով»,- ասում են ուսումնասիրության հեղինակները։
Գիտնականները զգուշացնում են, որ բազմացման շրջանի փոփոխությունները կարող են խաթարել պինգվինների հասանելիությունը սննդին, ինչն արդեն իսկ դարձել է Հարավային Աֆրիկայում հազարավոր պինգվինների մահվան պատճառ։
