Եթե Փաշինյանը մնա վարչապետի պաշտոնում, նա կարող է ավելի մեծացնել ճնշումը Եկեղեցու վրա․ «Независимая Газета»
Հինգշաբթի Նիկոլ Փաշինյանը մեկնել է Դավոս՝ միանալու ԱՄՆ նախագահ Դոնալդ Թրամփին՝ Գազայի հատվածի խնդիրը լուծելու համար «Խաղաղության խորհուրդ» ստեղծելու գործում: Այս պատմական իրադարձության նախօրեին վարչապետն ազգային խորհրդարանի ամբիոնից խոստացել է «ԿԳԲ-ի գործակալներին» հեռացնել Հայ առաքելական եկեղեցու (ՀԱԵ) ղեկավարությունից: Սակայն հոգևորականությունը վաղուց տեղյակ է պետության ղեկավարի տրամադրվածության մասին, ուստի՝ Գարեգին Բ կաթողիկոսը որոշել է, որ կարևոր հարցեր քննարկելու համար ավելի անվտանգ կլինի հավաքել հոգևորականներին արտասահմանում, քան տանը․ գրում է «Независимая Газета»-ն։
Գարեգին Բ-ն որոշել է եպիսկոպոսաց ժողովն անցկացնել Ավստրիայի Սանկտ Պյոլտեն քաղաքում: Հատկանշական է, որ կաթողիկոսը նախկինում միայն մեկ անգամ է այցելել Ավստրիա՝ 2001 թվականի նոյեմբերին: Միջոցառումը նախատեսված է փետրվարի 16-19-ը և կանդրադառնա «ՀԱԵ-ի շուրջ վերջին զարգացումներին և ներքին եկեղեցական կյանքին վերաբերող հարցերին»: Սկզբնապես այն նախատեսված էր 2025 թվականի դեկտեմբերի 10-12-ն Էջմիածնում, բայց կաթողիկոսը վերջին պահին փոխել է միտքը՝ հղում անելով հոգևորականների նկատմամբ «ճնշումներին»:
Ըստ կայքի հետ զրուցած փորձագետների՝ եթե Փաշինյանը մնա վարչապետի պաշտոնում ամռանը կայանալիք խորհրդարանական ընտրություններից հետո, նա կարող է ավելի մեծացնել ճնշումը Հայ առաքելական եկեղեցու նկատմամբ՝ ստիպելով Գարեգին Բ-ին տեղափոխել իր ամբողջ գործունեությունն արտասահման՝ այնտեղ հիմնելով աքսորյալ եկեղեցի։
