Իսրայելը պատրաստվում է ԱՄՆ-ի հետ ստորագրել նոր 10-ամյա անվտանգության համաձայնագիր

Իսրայելը հետաքրքրված է Միացյալ Նահանգների հետ նոր 10-ամյա անվտանգության համաձայնագիր կնքելով, որը կապահովի ամերիկյան ռազմական օգնության շրջանակ առաջիկա տարիների համար․ տեղեկացնում է Financial Times-ը։

Հրապարակումը գրում է, որ Երուսաղեմը պատրաստվում է այս հարցի շուրջ բանակցություններ վարել ԱՄՆ նախագահ Դոնալդ Թրամփի վարչակազմի հետ։

ԱՄՆ-ի և Իսրայելի միջև ռազմական օգնության վերաբերյալ ներկայիս փոխըմբռնման հուշագիրը գործում է մինչև 2028 թվականը։ Գործող փաթեթի համաձայն՝ Վաշինգտոնը պարտավորվել է Իսրայելին տրամադրել 38 միլիարդ դոլարի օգնություն 2019-2028 ֆինանսական տարիներին (ներառյալ ԱՄՆ-ի կողմից զենքի գնման ֆինանսավորումը և հրթիռային պաշտպանության հատուկ դրույթները)։

Ըստ FT-ի՝ քննարկման հիմնական տարրն ապագա աջակցության ձևաչափն է։ Իսրայելի ղեկավարները քննարկում են մի տարբերակ, որի դեպքում՝ երկիրն աստիճանաբար կհրաժարվի «դրամական դրամաշնորհներից» և փոխարենը կկենտրոնանա համատեղ նախագծերի և տեխնոլոգիական համագործակցության վրա։