«Բոլոր գործարքների մայր գործարքը»․ ԵՄ-ն ու Հնդկաստանը կնքել են կարևորագույն առևտրային համաձայնագիր՝ ԱՄՆ-ի հետ լարվածության ֆոնին

Գրեթե երկու տասնամյակ տևած բանակցություններից հետո ԵՄ-ն և Հնդկաստանը հայտարարել են կարևորագույն առևտրային համաձայնագրի կնքման մասին․ գրում է BBC-ն։

«Մենք դա արեցինք, մենք կնքեցինք բոլոր գործարքների մայր գործարքը»,- Դելիում լրագրողների հետ ճեպազրույցի ժամանակ ասել է Եվրահանձնաժողովի նախագահ Ուրսուլա ֆոն դեր Լեյենը։

Հնդկաստանի վարչապետ Նարենդրա Մոդին գործարքն անվանել է «պատմական»։

Համաձայնագրով հնարավոր կլինի ազատ առևտուր իրականացնել եվրոպական 27 պետությունների դաշինքի և աշխարհի ամենախիտ բնակեցված երկրի միջև։ ԵՄ-ն և Հնդկաստանը միասին կազմում են համաշխարհային համախառն ներքին արդյունքի գրեթե 25%-ը։

Ակնկալվում է, որ համաձայնագիրը երկու կողմերի համար զգալիորեն կնվազեցնի մաքսատուրքերը։ Եվրոպական հանձնաժողովը հայտարարել է, որ համաձայնագիրը կվերացնի քիմիական նյութերի, մեքենաների և էլեկտրական սարքավորումների, ինչպես նաև ինքնաթիռների և տիեզերանավի արտահանման տուրքերը՝ փուլային կրճատումներից հետո: Հատկանշական է, որ ավտոմեքենաների համար տուրքերը, որոնք ներկայում կազմում են մինչև 110%, կկրճատվեն մինչև 10%՝ 250․000 ավտոմեքենայի քվոտայի դեպքում:

Բրյուսելը հայտարարել է, որ համաձայնագիրը կաջակցի ներդրումային հոսքերին և կբարելավի եվրոպական շուկաներ մուտքը:

Դելին, իր հերթին, հայտարարել է, որ արտահանման իր գրեթե բոլոր ապրանքները կստանան «արտոնյալ մուտք» ԵՄ, իսկ տեքստիլ ապրանքների, կաշվի, ծովային արտադրանքի, ձեռքի աշխատանքների, թանկարժեք քարերի և զարդերի համար մաքսատուրքերը կնվազեն կամ կվերացվեն։

Համաձայնագիրը կարճաժամկետ հեռանկարում նաև կհեշտացնի Հնդկաստանի և ԵՄ երկրների միջև աշխատանքի նպատակով ճանապարհորդությունների ընթացակարգը։

Նշվում է, որ համաձայնագրի կնքմամբ կողմերը ձգտում են խորացնել կապերը՝ ԱՄՆ-ի հետ աշխարհաքաղաքական և տնտեսական լարվածության ֆոնին։