ԱՄՆ-ն և դաշնակիցները քննարկել են Իրանին վերաբերող ՄԱԿ-ի Անվտանգության խորհրդի բանաձևերի իրականացումը
Անցյալ շաբաթ ԱՄՆ-ն 40 երկրի հետ միասին հավաքվել էր Չեխիայում՝ մասնակցելու սիմպոզիումի, որը միտված էր Իրանի ռեժիմի վերաբերյալ ՄԱԿ-ի Անվտանգության խորհրդի վերահաստատված բանաձևերի իրականացման հետագա առաջխաղացմանը։ Մասնակիցները քննարկել են ՄԱԿ-ի անդամ պետությունների կողմից վերահաստատված պարտավորությունների կատարմանը վերաբերող հարցերի ամբողջ շրջանակը․ նշվում է ԱՄՆ պետքարտուղարության տարածած հայտարարությունում։
Սիմպոզիումի ընթացքում քննարկվել են «Իրանի ռեժիմի միջուկային, բալիստիկ հրթիռային և սովորական զենքի գործունեության հետևանքով առաջացող սպառնալիքները»։ Մասնակիցները քննարկել են վերականգնված բանաձևերում թվարկված դրույթներն ավելի վճռականորեն իրականացնելու համար բոլոր հնարավորություններն օգտագործելու կարևորությունը։
«Հաշվի առնելով Իրանի ռեժիմի կողմից միջուկային զենքի տարածման շարունակական սպառնալիքը և իրանցի ցուցարարների նկատմամբ դաժան ճնշումները՝ Միացյալ Նահանգները և գործընկերները գիտակցում են ՄԱԿ-ի Անվտանգության խորհրդի բանաձևերի և դրանց հետ կապված սահմանափակող միջոցների համընդհանուր կիրառումը խթանելու հրատապ անհրաժեշտությունը», – նշվում է հայտարարությունում։
ՄԱԿ-ի Անվտանգության խորհրդի 6 բանաձևերը՝ 1696, 1737, 1747, 1803, 1835 և 1929, վերականգնվել են 2025 թվականի սեպտեմբերի 27-ին: ՄԱԿ-ի Անվտանգության խորհրդի բանաձևերը ներառում են դրույթներ, որոնք պահանջում են, որ իրանական ռեժիմը կասեցնի ուրանի հարստացման, ծանր ջրի և վերամշակման հետ կապված գործունեությունը, արգելի Իրանին օգտագործել բալիստիկ հրթիռների տեխնոլոգիա, արգելի իրանական զենքի ներմուծումն ու արտահանումը, վերականգնի ճանապարհորդական արգելքները և համաշխարհային ակտիվների սառեցումը ցուցակագրված անձանց նկատմամբ, և թույլատրի Իրանից և դեպի Իրան տեղափոխվող արգելված բեռների առգրավումը:
