Իրանը Ռուսաստանի և Չինաստանի հետ համատեղ զորավարժություններ կանցկացնի Օմանի ծոցում և Հնդկական օվկիանոսում

Իրանի պաշտոնյաները հայտարարել են, որ Իրանի ռազմածովային ուժերն առաջիկա օրերին համատեղ զորավարժություններ կանցկացնեն Ռուսաստանի և Չինաստանի ռազմածովային ուժերի հետ Օմանի ծոցում և Հնդկական օվկիանոսի հյուսիսում․ գրում է Iraqi News Agency-ն։

Այս զորավարժությունները «Ծովային անվտանգության գոտի» պարբերական շարքի մաս են, որը կենտրոնանում է երեք երկրների միջև ռազմածովային համագործակցության, ծովային անվտանգության, ծովահենության դեմ պայքարի գործողությունների, որոնողափրկարարական և փոխգործունակության բարելավման վրա։ Զորավարժություններին սովորաբար մասնակցում են ռազմանավեր և անցկացվում են ամեն տարի 2019 թվականից ի վեր՝ հաճախ մեկնարկելով Իրանի «Չաբահար» նավահանգստի մոտ։

Հայտարարությունը հնչում է տարածաշրջանային լարվածության, ինչպես նաև փետրվարի 1-2-ը Հորմուզի նեղուցում Իրանի առանձին զորավարժությունների ֆոնին։