Վեհափառի կողմից երբեք կամայական որոշումներ չեմ տեսել․ Սյունյաց թեմի առաջնորդ
Ես ուխտ եմ արել, Իջման Սուրբ սեղանի առջև ծնկի եմ եկել, Սուրբ Էջմիածնի զավակ եմ և երբեք իմ ուխտը չեմ դրժելու՝ անգամ մահվան գնով․ ՔԿ-ի մոտ լրագրողների հետ զրույցում ասել է Սյունյաց թեմի առաջնորդ, հարցաքննության կանչված Մակար եպիսկոպոս Հակոբյանը։
Ադրադառնալով տեղեկությանը, թե կարգալույծ հռչակված եպիսկոպոս Արման Սարոյանը (Գևորգ եպիսկոպոս Սարոյան) դատարան է դիմել, Մակար սրբազանն արձագանքել է․ «Ես դատարան չէի տա, որովհետև մենք ուխտ ենք արել անվերապահ հնազանդության, հնազանդվելու Ամենայն Հայոց հայրապետին, ով կլինի Հայրապետ այդ ժամանակ, մենք պետք է ենթարկվենք և հնազանդության ուխտը պահենք։ Չգիտեմ՝ ով ոնց է մտածում, ինչ է անում, մեր կարգավիճակը ուխտով է և այդ ուխտը մենք կնքել ենք Աստծու հետ և Սուրբ Էջմիածնի հետ»։
Հարցին՝ կա տեսակետ, որ եպիսկոպոսի կարգալուծության հարցը չի կարող Վեհափառը միանձնյա լուծել և անհրաժեշտ է եպիսկոպոսած ժողով, Մակար սրաբազանը պատասխանել է՝ նշելով, որ Գևորգ եպիսկոպոսի դեպքում էլ Վեհափառը միանձնյա չի որոշել, դա տեղի է ունեցել գերագույն հոգևոր ժողովի որոշմամբ։
Խոսելով Փաշինյանի հռչական «Եկեղեցու բարենորոգման օրակարգի» և այն պնդումների մասին, թե Վեհափառը կամայական որոշումներ է կայացնում, Մակար սրբազանն ասել է․ «Երբեք կամայական որոշումներ չեմ տեսել, իսկ իմ աչքերը մեծ են»։
