Մեծ Բրիտանիայի թագավորի եղբայրը՝ հատակին պառկած կնոջ հետ․ Էփշտեյնի գործով նոր փաստաթղթերում կան նախկին արքայազնին վերաբերող լուսանկարներ
Էփշտեյնի գործով ԱՄՆ արդարադատության նախարարության հրապարակած նոր փաստաթղթերում կան լուսանկարներ, որոնցում Մեծ Բրիտանիայի նախկին արքայազն Էնդրյուն պատկերված է չորեքթաթ՝ կռացած դեպի հատակին պառկած կինը․ գրում է CNN-ը։
Մեծ Բրիտանիայի վարչապետ Քիր Սթարմերը նախկին արքայազնին կոչ է արել ցուցմունք տալ ԱՄՆ Կոնգրեսում սեռական հանցագործ Ջեֆրի Էփշտեյնի հետ իր կապերի մասին։
Ըստ հրապարակման՝ Էփշտեյնի գործով վերջին փաստաթղթերը պարունակում են նաև Էփշտեյնի և արքայազն Էնդրյուի միջև 2010 թվականի օգոստոսի էլեկտրոնային նամակագրություն, որում նախկին ֆինանսիստը նախկին արքայազնին հրավիրում է Լոնդոն՝ իր «ընկերոջ» հետ ընթրիքի։
Արքայազն Էնդրյուն պատասխանում է, որ «ուրախ կլինի տեսնել նրան», և խնդրում է նրան փոխանցել իր կոնտակտային տվյալները։ Այնուհետև Էփշտեյնն «ընկերոջը» նկարագրում է որպես 26-ամյա ռուս կնոջ, որը «խելացի է, գեղեցիկ և վստահելի»։
Պարզ չէ, թե երբ կամ որտեղ են արվել լուսանկարները. փաստաթղթի հրապարակման հետ մեկտեղ լուսանկարների վերաբերյալ որևէ գրություն չի տրամադրվել: Միևնույն ժամանակ, բրիտանական թագավորական ընտանիքի նախկին անդամը միշտ հերքել է իր դեմ ուղղված բոլոր մեղադրանքները։
Հիշեցնենք, որ ամիսներ առաջ Մեծ Բրիտանիայի Չարլզ III թագավորի եղբայր արքայազն Էնդրյուն զրկվել է իր բոլոր տիտղոսներից և այժմ հայտնի է որպես Էնդրյու Մաունթբեթեն-Վինձոր։
