ԵԱՏՄ-ն կմնա Հայաստանի կարևոր տնտեսական գործընկերը մոտ ապագայում․ ՌԴ փոխվարչապետ

Եվրասիական տնտեսական միությունը Հայաստանի ամենակարևոր տնտեսական գործընկերն է և կմնա այդպիսին նաև մոտ ապագայում․ հայտարարել է Ռուսաստանի փոխվարչապետ Ալեքսեյ Օվերչուկը։

«Ավելին, մենք տեսնում ենք, որ Հայաստանը ակտիվորեն զարգացնում է կապերը ոչ միայն Ռուսաստանի, այլև՝ ԵԱՏՄ մյուս անդամների, մասնավորապես՝ Ղազախստանի հետ։ Հացահատիկի առևտուրը սկսվել է նույնիսկ Ղազախստանի և Ղրղզստանի հետ։ Հետևաբար, ԵԱՏՄ-ն, այս առումով, շատ կարևոր դեր է խաղում Հայաստանի համար», – նշել է նա։

Փոխվարչապետը նաև մատնանշել է ԵԱՏՄ-ի և Իրանի միջև ազատ առևտրի համաձայնագրի ընձեռած հնարավորությունները։ «Ինչպես հայտնի է, Հայաստանը սահմանակից է Իրանին, և այս համաձայնագիրը փաստացի թույլ է տալիս առանց մաքսատուրքերի առևտուր իրականացնել իր արտադրանքի 90%-ի վրա։ Սա եզակի համաձայնագիր է։ Պատկերացրեք՝ 3 միլիոն բնակչություն ունեցող Հայաստանն այժմ իր սահմանին ուղիղ մուտք ունի ավելի քան 85 միլիոն բնակչություն ունեցող շուկայի», – հավելել է Օվերչուկը։

Միևնույն ժամանակ՝ ՌԴ փոխվարչապետը նշել է, որ Հայաստանում կան զգալի թվով մարդիկ, այդ թվում՝ երկրի ղեկավարության մեջ, ովքեր ցանկանում են ավելի սերտ կապեր Եվրամիության հետ։ «Եվ նրանք հանդիպում են, խոսում և ստորագրում փաստաթղթեր, որոնք հիմնականում վերաբերում են վիզային ռեժիմի ազատականացմանը և Եվրամիության ստանդարտների ներդրմանը։ Մենք ուշադիր հետևում ենք ստանդարտներին և տեխնիկական կանոնակարգերին վերաբերող հարցերին։ Մենք կարծում ենք, որ սա կարևոր է Եվրասիական տնտեսական միության ընդհանուր շուկան պահպանելու համար։ Սկզբունքորեն, այսօր ներդրվող ստանդարտները չեն հակասում Եվրասիական տնտեսական միությունում մեր ունեցածին։ Եթե նման դեպքեր առաջանան, մենք շատ բաց խորհրդակցություններ ենք անցկացնում մեր հայ դաշնակիցների հետ։ Նրանք մեր կողմից նման մտահոգությունները շատ լուրջ են ընդունում և համապատասխանաբար արձագանքում։ Որովհետև եթե նման հակասություններ սկսեն առաջանալ, մենք ստիպված կլինենք համապատասխանաբար պաշտպանել մեր շուկան», – նշել է Օվերչուկը։

https://tass.ru/ekonomika/26349773