ԵՄ-ը և ՀՀ-ն քննարկել են ՀՀ-ի և Ադրբեջանի միջև խաղաղության ինստիտուցիոնալացումը, ինչպես նաև Թուրքիայի հետ հարաբերությունների կարգավորումը
ԵՄ-ը և ՀՀ-ն վերահաստատել են իրենց գործընկերության ռազմավարական նպատակը և արտաքին, անվտանգության և պաշտպանական քաղաքականության ոլորտում համագործակցությունն ու համաձայնեցումը խթանելու համատեղ հանձնառությունը։ Այս մասին նշվել է ԵՄ-ՀՀ քաղաքական և անվտանգության հարցերով 3-րդ բարձր մակարդակի երկխոսության արդյունքների վերաբերյալ հայտարարությունում։
Կողմերն ընդգծել են քաղաքական և անվտանգության հարցերի շուրջ շարունակական, կառուցվածքային փոխանակումների կարևորությունը՝ որպես ԵՄ-ՀՀ Համապարփակ և ընդլայնված գործընկերության համաձայնագրի (CEPA) կարևոր հենասյուն։
Երկու կողմերն էլ ողջունել են երկկողմ հարաբերություններում առկա թափը և ընդգծել 2026 թվականի մայիսին նախատեսված ԵՄ-ՀՀ առաջին գագաթնաժողովի կարևորությունը Երևանում։
Կողմերը նշել են ԵՄ-ի արժեքավոր ներդրումը Հայաստանի դիմադրողականության և անվտանգության գործում, ինչպիսիք են ԵՄ առաքելության ներկայությունը Հայաստանում (EUMA) և Եվրոպական խաղաղության հաստատման շրջանակներում 2024 թվականից ի վեր ընդհանուր առմամբ 30 միլիոն եվրո արժողությամբ աջակցությունը։
Երկխոսության ընթացքում անդրադարձ է եղել նաև հիբրիդային, կիբեր և տեղեկատվական տարածքի հետ կապված սպառնալիքներին։ ԵՄ-ը և Հայաստանը համաձայնել են շարունակել համագործակցությունն այս ոլորտում՝ «Հայաստանի ժողովրդավարական գործընթացներին չարամիտ միջամտությունը կանխելու համար»։
Կողմերը քննարկել են նաև տարածաշրջանային և աշխարհաքաղաքական զարգացումներն, այդ թվում՝ Հայաստանի և Ադրբեջանի միջև խաղաղության ինստիտուցիոնալացումը, ինչպես նաև Հայաստանի և Թուրքիայի միջև հարաբերությունների կարգավորումը։ Նրանք վերահաստատել են իրենց ընդհանուր հանձնառությունը՝ Հարավային Կովկասում խաղաղությունը, կայունությունը և տարածաշրջանային կապը խթանելու հարցում։
ԵՄ-ն աջակցություն է հայտնել երկու գործընթացներին էլ՝ համաձայն տարածաշրջանի բոլոր երկրների ինքնիշխանության, տարածքային ամբողջականության և սահմանների անձեռնմխելիության սկզբունքների։ Քննարկվել է նաև TRIPP երթուղու գործարկման վերջին զարգացումները։
ԵՄ-ը վերահաստատել է իր շարունակական աջակցությունը Հայաստանի ժողովրդավարական բարեփոխումներին։ ԵՄ-ի և Հայաստանի միջև քաղաքական և անվտանգության հաջորդ երկխոսությունը տեղի կունենա Բրյուսելում 2027 թվականին։
