Այսօր, երբ աշխարհում երբեմն ուժը շատ ավելի կարևոր նշանակություն ունի, քան իրավունքը, մենք գտնվում ենք ամենաթույլ վիճակում․ Վազգեն Մանուկյան
Դեկտեմբերի 2-ին տեղի
է ունեցել ԱԺՄ (Ազգային ժողովրդավարական միություն) կուսակցության խորհրդի նիստ, որը
վարել է ԱԺՄ նախագահ Վազգեն Մանուկյանը։
Ներածական խոսքում
Մանուկյանն անդրադարձել է 1988 թ․ համազգային շարժման խնդիրներին ու նպատակներին՝ նշելով,
որ Շարժման միջոցով իշխանության գալուց հետո իշխանությունները հետզհետե որոշակի շեղումներ
թույլ տվեցին այդ սկզբունքների ու նպատակների իրագործման ճանապարհին, և ԱԺՄ-ն պայքարում
էր դրա դեմ։
Խոսելով 2018 թվականի
իշխանափոխության մասին՝ Մանուկյանն անդրադարձել է այդ իշխանափոխության ներքին և աշխարհաքաղաքական
արտաքին խորքային պատճառներին։
Վազգեն Մանուկյանը
խոսել է նաև 44-օրյա պատերազմի ու պարտության, դրան հաջորդած ընդդիմադիր շարժումների
մասին՝ անդրադառնալով այդ շարժումների ձախողման պատճառներին, ներկայացրել այս պահին
ընդդիմադիր դաշտում ստեղծված իրավիճակը, ազգային իշխանության ձևավորան հրատապությունն
ու դրան հասնելու հնարավորությունները։
«Այսօր, երբ աշխարհում երբեմն ուժը շատ ավելի կարևոր նշանակություն
ունի, քան իրավունքը, մենք գտնվում ենք ամենաթույլ վիճակում»,-ասել է նա՝ նշելով, որ
մեր երկիրը նախ պետք է ուժեղանա և այդ դիրքերից կարողանա հարաբերվել այս տարածաշրջանում
հետաքրքրություններ ունեցող բոլոր պետությունների հետ։
Ընդգծվել է, որ ստեղծված իրավիճակում միայն ընդդիմադիր դաշտի համախմբման և միասնական
քայլերի միջոցով հնարավոր կլինի ստեղծել համազգային շարժում (որտեղ իր ուրույն դերը
կունենա նաև ԱԺՄ-ն) և հասարակական ճնշող պահանջի ներքո պարտադրել այս իշխանության հեռացումը՝
ձևավորելով ազգային իշխանություն, որն ի վիճակի կլինի լուծել մեր խնդիրներն ու առաջ
տանել մեր ազգային շահերը։
