ԱՄՆ ղեկավարությունն ունի գերիների հարցում աջակցելու իրական հնարավորություն․ Արտակ Բեգլարյան
Դոնալդ Թրամփի խոստումը՝ ոչ միայն վերադարձնելու հայ գերիներին, այլև հետամուտ լինելու հայ ժողովրդի դեմ իրականացված հալածանքների գոնե մի մասի վերացմանը, ունի հստակ քաղաքական և հումանիտար նշանակություն․ այսօր նախագահական նստավայրի դիմաց կազմակերպված ակցիայի ժամանակ ասել է Արցախի նախկին պետնախարար Արտակ Բեգլարյանը;
«Բոլորս գիտենք, որ հայ գերիները Ադրբեջանում փաստացի պատանդներ են բռնապետ Ալիևի ձեռքում։ «Պատանդ» հասկացությունը նշանակում է, որ նրանք օգտագործվում են և կարող են օգտագործվել քաղաքական առևտրի նպատակներով»,-ասել է Բեգլարյանը։
Նա նշել է, որ ԱՄՆ ղեկավարությունն ունի իրական հնարավորություն՝ որպես տարածաշրջանում խաղաղությամբ և Հայաստանի ու Ադրբեջանի միջև դիվանագիտական հարաբերությունների վերականգնմամբ շահագրգռված կողմ, կատարելու մեկ հստակ քայլ, որը կարող է մոտեցնել իրական խաղաղությունը։
«Իհարկե, այդ քայլով մեր ժողովուրդները չեն հաշտվի, և դրանով ամբողջապես չեն վերացվի Արցախի ժողովրդի դեմ իրականացված ցեղասպանության հետևանքները։ Սակայն սա կլինի հստակ, մեծ հումանիտար առաջընթաց՝ դրական շարժ դեպի առաջ, որը կբացի նոր հնարավորությունների դռներ հետագա հիմնախնդիրների հասցեագրման և երկարաժամկետ խաղաղության ապահովման համար»,- ասել է Բեգլարյանը։
Նրա խոսքով՝ Ադրբեջանում դատապարտվում և խոշտանգվում են հայերը միայն այն պատճառով, որ հայ են։ Այնտեղ գտնվող յուրաքանչյուր հայ ներկայացնում է ամբողջ ժողովրդին։ Եվ քանի դեռ գոնե մեկ հայ գտնվում է ադրբեջանական բանտում, խաղաղություն և հաշտություն հնարավոր չեն։
«Մենք փոխնախագահ Վենսից խնդրում ենք, հորդորում ենք և անգամ պահանջում ենք, որ Բաքու իր առաջիկա այցի ընթացքում հստակ և առաջնահերթ կերպով բարձրացնի․ բոլոր 19 հայ պատանդների անհապաղ ազատ արձակման հարցը, անհայտ ճակատագրերի պարզման ուղղությամբ գործնական քայլերի իրականացումը, Արցախի ժողովրդի վերադարձի ապահովման ուղղությամբ գործնական մեխանիզմների ներդրումը»,- ասել է Արտակ Բեգլարյանը։
