ԱՄՆ-ն Կանադային կապող կամուրջը չի բացվի մինչև Կանադան ԱՄՆ-ին չվերաբերվի այն արդարությամբ և հարգանքով, որին մենք արժանի ենք․ Թրամփ
ԱՄՆ նախագահ Դոնալդ Թրամփը սպառնացել է խոչընդոտել ԱՄՆ-ն և Կանադան կապող կամրջի բացմանը, քանի դեռ Վաշինգտոնն իր հյուսիսային հարևանին տված ամեն ինչի համար «լիովին չի փոխհատուցել»․ գրում է BBC-ն։
ԱՄՆ նախագահը սոցիալական ցանցերում գրել է, որ Գորդի Հոուի անվան միջազգային կամուրջը, որը կապում է Կանադայի Օնտարիո նահանգը ԱՄՆ-ի Միչիգան նահանգի հետ, չի բացվի այնքան ժամանակ, քանի դեռ Օտտավան «Միացյալ Նահանգների հետ չի վերաբերվել այն արդարությամբ և հարգանքով, որին մենք արժանի ենք»։
Նախագծի կայքի համաձայն՝ կամուրջը ֆինանսավորվում է Կանադայի կառավարության կողմից, բայց կլինի և՛ Կանադայի, և՛ Միչիգանի սեփականությունը։
Հստակ չէ, թե ինչպես կարող է ԱՄՆ նախագահը խոչընդոտել կամրջի բացմանը, սակայն, նրա խոսքով՝ այս ուղղությամբ բանակցությունները կսկսվեն անմիջապես։
