Ինչո՞ւ է Վենսն այցելում Հայաստան և Ադրբեջան․ Deutsche Welle

ԱՄՆ փոխնախագահն այցելում է Հայաստան և Ադրբեջան, քանի որ Վաշինգտոնը ձգտում է ընդլայնել իր ազդեցությունը Հարավային Կովկասում՝ տարածաշրջանում, որտեղ Ռուսաստանն ավանդաբար եղել է գլխավոր ուժային միջնորդը, սակայն Ուկրաինայում պատերազմը սկսելուց հետո նրա ազդեցությունը նվազել է․ գրում է Deutsche Welle-ն։

Վենսի այցի մի մասն է կազմում ԱՄՆ-ի միջնորդությամբ իրականացվող խաղաղության գործընթացի ամրապնդումը, որը համարվում էր կարևոր քայլ՝ Ադրբեջանի և Հայաստանի միջև Լեռնային Ղարաբաղի շուրջ տասնամյակներ տևած պատերազմի ավարտի ուղղությամբ։

Ալիևի հետ հանդիպումից առաջ Վենսը հայտարարել է, որ Ադրբեջանում պատերազմական հանցագործությունների մեղադրանքով բանտարկված հայ առաջնորդների հարցն «անշուշտ կբարձրացվի» Ադրբեջանի ղեկավարների հետ բանակցությունների ժամանակ։

Վենսը նաև քննարկումների առիթ դարձավ՝ ջնջելով X-ում գրառումը, որտեղ նշվում էր, որ ինքը և իր կինը՝ Ուշա Վենսը, «Հայոց ցեղասպանության հուշահամալիրում են՝ 1915 թվականի Հայոց ցեղասպանության զոհերին հարգանքի տուրք մատուցելու համար»։

Վենսի գրասենյակը հայտնել է, որ գրառումը սխալմամբ հրապարակվել է պատվիրակության կազմում չընդգրկված աշխատակիցների կողմից։

Վենսի կովկասյան ուղևորությունը, ինչպես սպասվում է, կխթանի նաև տրանսպորտային հաղորդակցության նախագիծը՝ «Թրամփի երթուղին» (TRIPP)։

Վաշինգտոնը TRIPP-ը ներկայացնում է որպես տարածաշրջանային խաղաղության համար վստահության ամրապնդման միջոց, իսկ Ադրբեջանը հայտարարել է, որ տարածաշրջանային հաղորդակցությունների բացումը կարևոր նախապայման է Հայաստանի հետ համապարփակ խաղաղության պայմանագիր կնքելու համար։